Editorial » Latifi
Blerim Latifi: Një shënim për datën kur lindi Kastrioti i Madh
E hene, 09.05.2022, 09:32 PM
Blerim Latifi:
Një
shënim për datën kur lindi Kastrioti i Madh
Në
mesin e shekullit XV kur invadimi otoman i Europës dukej aq afër, dy burra të
Ballkanit po luftonin fort kundër këtij invadimi. Njëri shqiptar, tjetri rumun.
Shqiptari quhej Gjergj Kastrioti, rumuni quhej Vlad Tepeshi-Drakula. Të dy
shpejt do ta pushtonin imagjinatën e Europës së tmerruar nga shpata otomane.
Por me një dallim esencial: shqiptari Gjergj Kastrioti si hero i lirisë dhe i
mbrojtjes së qytetërimit europian, ndërsa Vlad Drakula si figurë e mizorisë dhe
e gjakpirësit të pamëshirshëm. Kjo erdhi ngase Vladi donte t'ia kalonte Sulltan
Mehmetit II në ushtrimin e mizorisë, ndërsa Kastrioti nuk e bënte dot një gjë
të tillë, sepse ishte i lidhur fort me normat kanunore, të cilat nuk ia lejonin
gjymtimin dhe masakrimin e robërve të kapur në betejë.
Dhe,
kështu, ndërsa figura e tij u bë sinonim i
të mirës, ajo e Vladit u bë sinonim i të keqes. Sot bustet e Kastriotit
qëndrojnë gjithandej shesheve të Europës, ndërsa emri i Vladit na kujton
vampirin e Bram Stokerit.
Në
kështjellën e Krujës turistët shkojnë të nxitur nga imagjinata e lirisë, ndërsa
në kështjellën e Drakulës në Transilvani të nxitur nga imagjinata e horrorit.
Dhe krejt kjo na e kujton një mësim të rëndësishëm moral: kur luftojmë për
lirinë tonë kurrë nuk duhet të jemi më mizor se armiku ynë!
__________
Shndërrimi
i Ditës së Evropës në ditë feste zyrtare në Kosovë, është produkt i kohës së
shpalljes së pavarësisë. Ajo ishte kohë e euforisë, entuziazmit dhe naivitetit
të madh.
Me
naivitet besonim se, meqë Kosova ishte bërë shtet, tani çdo gjë do të shkonte
mirë dhe shpejt, përfshirë edhe integrimin në BE. Prandaj, pse të mos festonim.
Por,
ajo që kalon më shpejt, është vetë euforia. Vendin e saj e zë zhgënjimi, i cili
vjen për të na dhënë leksionin se gjërat e mira nuk bëhen lehtë dhe shpejt, dhe
se politika, sa është art i zgjidhjes së problemeve të shoqërisë, po aq di të
bëhet edhe art i krijimit të tyre.
Fatkeqësisht
kjo e dyta ka vite që predominon tek ne. Prandaj, në këtë kontekst, Dita e
Europës, në vend të festës, realisht paraqet një farsë.
__________
Diplomaci
e Kosovës nuk quhet të vizitosh vendet që na kanë njohur prej kohësh, e me të
cilat nuk ke asnjë çështje të hapur dhe ndikimi i tyre në zhbllokimin
ndërkombëtar të Kosovës është i barabartë me zero.
Kjo
është humbje kohe, shpenzim i kotë i pareve të shtetit dhe mashtrim i vetes se
po bëjmë diçka.
Diplomaci
e Kosovës nuk quhet të shetitemi atyre rrugëve që na i kanë hapur të tjerët, e
t'i takojmë ata miq që na i kanë kriju të tjerët, pa qenë të zotë të hapim
rrugë të tjera e të krijojmë miq të rinj.
Diplomaci
e Kosovës quhet ajo që ia del t'i prekë shtetet që nuk na kanë njohur, e në
rend të parë pesë shtetet e Bashkimit Europian, sepse aty është shkaku i
bllokimit të procesit të avancimit të subjektivitetit ndërkombëtar të Kosovës
dhe shkaku i manovrave të vazhdueshme të Serbisë kundër shtetit tonë.
Por
kësaj pune nuk ia themi dot, sepse jemi dembela, krejt jeta na shkon duke shiku
kush po na e jep ndonjë ndihmë dhe në fund flemë të qetë me mendimin se Amerika
ka me na i kry punët, e neve na mbetet veç me vrapu me i rrëmby meritat, të
cilat, pastaj, i përdorim në kacafytjet e brendshme politike për pushtet.
__________
Paskan
dalë partitë nëpër diasporë me i konsolidu degët e tyre atje. Definitivisht
punë me mend, sepse qysh janë duke shku punët këtu në Kosovë nuk do të jetë e
largët dita kur krejt elektorati kosovar në diasporë do të ndodhet. Ndërsa
degët e partive këtu do jenë vetëm seksione të degëve në diasporë.
__________
Problemi
numër një i Bashkimit Europian aktualisht është lufta në Ukrainë dhe shantazhi
që po ia bën Rusia përmes gazit. Në këtë situatë çështja e dialogut Kosovë -
Serbi për Bashkimin Europian ka rëndësi vetëm në aspektin e sigurisë rajonale.
Krejt çfarë duan nga Kosova dhe Serbia në këtë moment është përkushtimi për
stabilitet dhe shmangie të tensioneve midis dy vendeve. Kush beson se tani do
të kemi një marrëveshje Kosovë- Serbi me ndërmjetësimin e Bashkimit Europian,
thjesht është naiv. Bashkimi Europian edhe në ditët më të mira të tij s'kanë
qenë në gjendje t'i lëvizë gjërat, e po është tash kur po vuan varësinë
poshtëruese nga gazi rus. Në këtë kontekst më e pakta që kemi në dorë është të
mos i lejojmë që të na marrin për budallenj që mjaftohemi me fjalë të bukura
dhe premtime të kota.
__________
Zelenski
në fjalimin adresuar Kuvendit të Shqipërisë: "Kujtoj Shën Terezën, shqiptaren
që është kthyer në simbolin dashurisë ndaj njerëzimit në të gjithë botën. Ajo e
mësoi njerëzimin që të mposhtë të keqen".
E
gjithë bota përkulet para shembullit të shqiptares më të madhe të të gjitha
kohëve dhe, për çudi, vetëm në atdheun e saj dhe në gjuhën e saj vazhdojnë të
dëgjohen zuzarë e faqezi që e ofendojnë dhe e përçmojnë kurdo që u jepet rasti.
__________
Në
kët' vend e sigurtë është veç pasiguria!
Kur
del në rrugë duhet të kesh kujdes se papritur prapa mund të të sulet ndonjë
qen, nga lukunia e madhe e qenve që e popullojnë Prishtinën.
Po
ashtu duhet të kesh kujdes gjatë kohës që ecë trotuarit ose kur je duke kaluar
rrugën, sepse janë shumë të mëdha gjasat që ta pësosh keq nga ndonjë hajvan që
vozitë në mes të qytetit si në garat e Formulës.
Pastaj
kur parkohesh në parkingun publik të ndonjë marketi, sepse fort ka gjasa që kur
të dalësh ta gjesh makinën të bërë shkrumb e hi, ja kështu siç ndodhi sot në
parkingun e njërit prej marketeve më të mëdha të Prishtinës.