Vjollca Pasku: Fli

Vjollca Tiku Pasku

Fli

Fli, se unë do bëhem engjëll i gjumit tënd,

të ndjek në ëndrra që ndizen dhe shuhen,

atje ku errësira nxit shëmtinë e zezë dhe dënd,

do ndizem dritë në mokrrën e flakës të bluhem.

Tani ti hyn ngadalë në buzëqeshjen e një bilbili,

më pas në qytetin e madh magjik çelur me lule Marsi,

mos hyr në lumin e turbulluar të gjendesh në kërthiz krokodili,

të ngre një urë, jo më mirë po e shuaj këtë ëndërr çasti.

Fli i qetë si pëllumbat me sqepin futur në krahë,

teksa janë gati të nesërmen për fluturim,

ti e di se në hapsirë fshihet busulla pa kahë,

dyndyr  me mistere që trazojnë shpirtin tim.

Fli, se një pikë gjumë është një ëndërr më shumë!