Shtesë » Lajme
Illyricum Libertas: Deklaratë me rastin e 67 vjetorit të gjenocidit grek ndaj shqiptarëve në Çameri
E hene, 27.06.2011, 07:58 PM
Shoqata për mbrojtjen dhe afirmimin e identitetit kombëtar
www.illyricumlibertas.org
illyricumlibertas@live.com
Deklaratë
Sh.m.a.i.k ILLYRICUM LIBERTAS –Tetovë, me rastin e 67 vjetorit të masakrës së madhe greke ndaj popullsisë shqiptare të Çamërisë (1944-2011), i bashkohet dhimbjes së madhe të kombit shqiptar në këtë ditë tragjike të historisë sonë kombëtare.
Illyricum Libertas është pranë dhe bashkë me shqiptarët tanë në Qafë-Botë, vendin që simbolizon ndarjen e dhimbshme të kombit tonë dhe mbetjen e një pjese të territorit dhe kombit nën sundimin e huaj.
Vërejmë me keqardhje të plotë, që apeli popullor drejtuar parlamenteve respektive të Maqedonisë dhe Kosovës për miratimin e rezolutës që dënon gjenocidin grek nuk u bë realitet as këtë vit. Kërkojmë nga këto dy organe përfaqësuese që të miratojnë rezolutën në fjalë sa më parë që të jetë e mundur.
Kërkojmë nga qeveria greke që në kuadër të respektimit të konventave ndërkombëtare nënshkruese e të cilave është vetë ajo, të lejojë qytetarët shqiptarë me origjinë nga krahina e Çamërisë të vizitojnë varret dhe pronat e të parëve të tyre dhe të ndalë praktikën antidemokratike të moslejimit të kalimit të kufirit grek për këtë kategori të qytetarëve shqiptarë.
Përkrahim plotësisht dhe pa rezerva përpjekjet e faktorëve politikë dhe civilë në Shqipëri që zgjidhjen e çështjes çame e kanë në krye të agjendës së tyre.
Apelojmë që kauza e shqiptarëve të Çamërisë dhe territorit të kësaj krahine të mos reduktohet në çështje pronash, por të fitojë dimensionin e duhur si problem i shkeljes së të drejtave individuale dhe kolektive të një popullsie të deportuar padrejtësisht nga trojet e veta historike.
Apelojmë tek faktorët ndërkombëtarë, para së gjithash tek miqtë dhe vëllezërit tanë europianë dhe amerikanë, që të ndërmjetësojnë në gjetjen e një zgjidhje të drejtë dhe humane për këtë çështje madhore në Ballkan dhe më gjerë.
Tetovë/Oaeneum
26.06.2011