Vlora Gashi: Gratë Shqiptare dhe Veshja Arabe - Identitet, Besim-manipulim apo Keqkuptim?

Gratë Shqiptare dhe Veshja Arabe: Identitet, Besim-manipulim apo Keqkuptim?

Nga Vlora Gashi

Në sheshet e qyteteve shqiptare, gjithnjë e më shpesh shihen gra të mbuluara me shami, me nikab, abaja apo veshje që lidhen ngushtësisht me kulturën arabe. Shpesh, këto gra thonë se kjo është pjesë e identitetit të tyre si shqiptare myslimane, një mënyrë për të treguar devotshmëri dhe përkatësi fetare. Por a është kjo veshje me të vërtetë pjesë e trashëgimisë shqiptare, apo po përjetojmë një transformim identitar që meriton reflektim?

Veshja tradicionale shqiptare, në të gjitha trevat dhe për të gjitha besimet, ka qenë gjithnjë e veçantë, elegante dhe unike, por jo me veshje të huaja nga Lindja e Mesme.

Kur veshja arabe importohet sot në rrugët shqiptare dhe shpallet si pjesë e "identitetit tonë shqiptar", lind pyetja: a po humbasim vetveten duke marrë formën e dikujt tjetër? A është kjo një mënyrë për t’u dalluar fetarisht, apo një ndikim i huaj që po përthithet pa reflektim?

Nuk është fjala për të gjykuar fenë apo zgjedhjet personale, por për të dalluar ndryshimin midis traditës autentike dhe imitimit kulturor.

Të jesh shqiptare myslimane nuk do të thotë domosdoshmërisht të mbulohesh me veshje arabe. Vlera e identitetit shqiptar qëndron pikërisht në identitet, gjuhë, me rrënjët në tokën tonë.

Askush nuk ka të drejtë të imponojë si duhet të vishet një grua. Por gjithashtu, askush nuk duhet të deformojë historinë dhe identitetin kombëtar për të përligjur një zgjedhje që është më shumë ndikim se trashëgimi, e në fund tradhëti kombëtare.

Vlora Gashi

https://www.facebook.com/loragashi1988