Gjon Keka: Festa e 4 Korrikut dhe miqësia e Presidentit Dr. Ibrahim Rugova me SHBA

Festa e 4 korrikut dhe miqësia e presidentit dr. Ibrahim Rugova me ShBA

Nga Gjon Keka

Mendimet e mia për festën kombëtare të ShBA-së zgjerohen, sepse është ajo që iu gjendet popullit tonë në kohë të vështira dhe në prag të zhdukjes. Aq më tepër sa herë kujtojë këtë datë të shënuar, pra datën 4 korrik që tregon vulën e pavarësisë së ShBA, nuk mund të mos e kujtojmë edhe presidentin historik e vizionar dr. Ibrahim Rugova që ishte tepër i lidhur jo vetëm me këtë datë të 4 korrikut, por edhe me vetë popullin mik Amerikan.

Shqiptarët e Kosovës, por edhe gjithë shqiptarët si komb kanë mjaftë arsye ta festojnë bashkë këtë datë të madhe të popullit amerikan, pra 4 korrikun, sepse kombin tonë e lidhë dhe është i detyruar të jetë mirënjohës ndaj SHBA-së sidoms për përkrahjen e saj të madhe si në kohën e Presidentit ëilson, ashtu edhe më vonë në kohën e Presidentit Klinton. Me një fjalë ShBA-t për Kosovën dhe Shqipërinë është shpëtimtarja e saj dhe mbështetsja më e madhe në të gjitha periudhat deri më sot.

Kështu me të drejt presidenti ynë i pavdekshëm dr.Ibrahim Rugova e mbajti lidhjen e fuqishme të miqësisë me miken e madhe ShBA dhe e dinte se vetëm prej saj vjen shpëtimi dhe mbështetja dhe se Kosova e arriti aspiratën e saj me vulën dhe mbështetjen e ShBA-së, NATO-s dhe vendeve mike europiane.

Presidenti Rugova ishte vizionar dhe i urtë, prandaj edhe thoshte :"Amerika dhe Europa do të na ndihmojnë, NATO do të ndërhyjë dhe kërkonte të vendoset në Kosovë për të siguruar paqen", dhe të gjitha këto që i tha u bënë më pas realitet.

Ai sigurisht se këto fjalë i thoshte duke qenë i sigurtë sepse këtë siguri dhe mbështetje e kishte marrë nga ShBA, por edhe nga fjalët që i kishte dërguar humanistja e madhe e kombit tonë dhe botës Nënë Tereza që i kishte kërkuar presidentit Klinton që të bënte diçka për ta shpëtuar popullin e saj në Kosovë.

Fjalët si këto të presidentit Rugova :"Amerika na ka premtuar se do të na ndihmojë dhe na ka siguruar që çështja e Kosovës të vendosej në agjendën ndërkombëtare me prioritet", tregojnë atë që i nënvizua këtu më lartë.

Kur jemi te kjo datë e shënuar e kombit amerikan, po i ndaj fjalët që shkruante një shkrimtar europian(O.Z.) në vitin 1897 në lidhje me këtë datë të shënuar historike të popullit amerikan: „festimi i 4 korrikut në Amerikë është në fakt dhe në kuptimin më të plotë të fjalës një manifestim i madh kombëtar, një që nuk mund ta imagjinoja më prekës dhe universal. Një kontinent i tërë gëzon në harmoni të pandarë.kudo jehojnë himnet e lirisë dhe pavarësisë. Gjithçka feston; gjithçka ndihet e ngritur; flamujt që valëviten, muzika që tingëllon, fishekzjarrët që kërcasin, turma që këndon, njerëzit që festojnë i japin shprehje motos së madhe: "E pluribus unum"( Out of many, one). Nuk është çudi që amerikanët, edhe larg atdheut të tyre dhe në diasporë midis popujve të Botës, nuk mund t'i rezistojnë kujtimeve të lavdishme në këtë ditë dhe të festojnë kudo që të jenë."

Gëzuar mikja e shpëtimtarja jonë ShBA dhe testamenti i presidentit dr.Ibrahim Rugova u bëftë realitet që miqësia jonë me ShBA-t të jetë e përjetshme.

Zoti e bekoftë Amerikën.

Zoti e bekoftë Dardaninë(Kosovën) dhe Arbërinë e Gjergj Kastriotit.