Kadri Tarelli: Në Vlorë, në ditët e ngrohta të korrikut

Sa absurd janë njerëzit....! Kurrë nuk i përdorin liritë që kanë, por kërkojnë ato që nuk i kanë. Ata kanë lirinë e mendimit dhe kërkojnë lirinë e fjalës. - Soren Kiergegard

NË VLORË, NË DITËT E NGROHTA TË KORRIKUT

Takim me çiftin Haxhiraj: Vilhelme Vrana dhe Fitim Haxhiraj

Nga Kadri Tarelli

Në këto ditë të ngrohta të fillim-korrikut, më saktë, më: 06, 07, 2025, një grup shokësh nga Durrësi: Zija Beqja, Shpendi Topollaj dhe unë Kadri Tarelli, më kot pritëm edhe dy të tjerë, u nisëm drejt Vlorës pa u trembur nga vapa e Korrikut. Qëllimi: një takim me dy personalitete të letërsisë dhe artit skenik, bashkëshortët, znj. Vilhelme dhe Fitim Haxhiraj.

Ishte një takim miqësor, i planifikuar disa muaj më parë, por mbetur i pa realizuar, më së shumti për arsye objektive. Të gjithë e dimë, se pritja dhe zgjatja e kohës është e padobishme, duke krijuar një hapësirë boshllëku që mbetet si gjemb që shpon sa herë kujtohesh dhe shkel për fjalën e dhënë dhe punën e pa mbaruar.

Nuk shtoj fjalë që të gjithë krijuesit i dinë mbase edhe më mirë se unë: takime të tilla jo vetëm kujtojnë dhe forcojnë miqësinë, por janë të dobishme edhe për rrahje mendimesh, lidhur me krijimtarinë e gjithsecilit: - Ç’kemi shkruar e botuar, dhe më shumë çfarë kemi në dorë për ditët në vijim. Natyrisht duke u kujdesur më shumë për shëndetin.

Si përherë në takime të tilla, shkëmbyem libra. Zakon i hershëm, mendoj i bukur në marrëdhënie miqësore mes krijuesve, ku shpirti dhe zemra janë pranë dashurisë e mirëkuptimit dhe larg cmirrës vrastare e shkatërrimtare. Unë i dhurova librin tim më të fundit, “Filxhani me buzë të kafshuar”, (Tregime), edhe për zotin Hajro Kapaj dhe kolegen mësuese znj. Lejla Gorishti, gjuhëtare, letrare dhe redaktore e përkushtuar dhe e papërtuar për të gjithë librat e botuara nga znj. Vivra. Mjafton të përmend edhe librin “Në botën letrare të Kadri Tarellit”, shkruar e botuar një vit më parë nga Vilhelme Vranari.

Do të çuditesha sikur Shpendi të mos dhuronte libra të botuara kohët e fundit.......! Zakon i hershëm i tij, që në çdo takim mes miqsh dhe krijues kudo ku ndodhen, hap çantën dhe shkruan dedikimin. Madje më shumë në trevat Shqiptare, Dardani e Maqedoni.

Ndërsa shkrimtarja dhe studiuesja  e njohur në letrat shqipe, znj. Vilhelme na dhuroi tre librat e saj më të fundit: “Ai dhe ajo.... ‘E çmendura”, (Roman), “Mirënjohja virtyt i kujtesës”. Volumi II-të dhe “Kështu ka ndodhur”. Ese-publicistika-IV. Libra që duhen studiuar pasi prekin tema të thukëta të ditëve që kalojmë.

Pas kafes në Vlorë dhe drekës në Dukat të Vjetër, u ndamë duke uruar njëri-tjetrin: - Shëndet të mirë dhe suksese në krijimtari të bukur!

- Mirë u takofshim në Durrës. Ju mirëpresim...!

Miqësisht!

Kadri Tarelli

Shënim: Zakonisht takime të tilla shoqërohen me fotografi, që fiksojnë kohën dhe njerëzit.

E-mail.

Përshëndetje nga Lejla Gorishti.

Mirëdita Kadri!

Uroj të jeni mirë familjarisht!

Kur, mikja jonë e mirë Vili, më tha se Kadriu ka lënë një libër ty, të them të drejtën m’u bë qejfi shumë.

E para, se të dhurosh një libër nuk ke dhuruar vetëm dije, po dhe atë mund e djersë, derdhur në faqet e tij.

E dyta, ai libër mban në faqe të parë një dedikim që shpreh vlerësim dhe nderim për mua. Për këtë të falënderoj me zemër! Për më tepër pasi të lexoj librin.

Edhe një herë të falënderoj me nderim, miku dhe kolegu im me zemër të madhe.

Urime dhe suksese në vijueshmërinë tuaj krijuese!

Paçi shëndet dhe muzë krijuese.

Lejla Gorishti

Vlorë, më, 06. 07. 2025