Ndue Ukaj: Mashtrimi i ri i Albin Kurtit

Ndue Ukaj:

“Aspekti më tmerrues i komunizmit ishte aftësia e tij për ta dëbuar të vërtetën prej çështjeve njerëzore dhe për ta detyruar krejt popullatën të jetonte brenda gënjeshtrës”, thoshte presidenti Vaclav Havel, shkrimtar e president, një udhëheqës i kulturuar, që fliste për të vërteten dhe besonte në të.

Nëse e kontekstualizojmë këtë fjali të Havelit  brenda sjelljeve e gjuhës politike të Albin Kurtit, e shohim qartësisht se kryeministri i Kosovës është pjellë e kësaj ideologjie dhe përfaqëson këtë mendësi.

Kjo është arsyeja pse ai çirret e bërtet, turfullon e fyen, sepse, synim ka ta bindë elektoratin, të mos i besojë të vërtetës, dhe kjo ka bërë që përbrenda oborrit të tij plot palaço, të mbizotërojë një indiferencë e tmerrshme kundrejt të vërtetës.

Kosova është nën sanksione të Amerikës e të Europës, për shkak të qeverisjes thellësisht joperëndimore dhe kjo është tema kryesore e vendit tonë, një temë që duhet ta bëjë me marre e me faj secilin njeri normal.

Po, njerëz, vendi ynë është në anën negative të zhvillimeve politike perëndimore.

Më e keqja, kryeministri ynë i ka dyert e mbyllura në Shtëpi të Bardhë e në shumicën e vendeve perëndimore.

Kjo është njollë e zezë që nuk e fshin asnjë propagandë.

Të anashkalosh këtë temë, ndërkaq, domethënë t’i shtysh njerëzit  me gjithë makinerinë e propagandës së shtetit, të jetojnë brenda gënjeshtrës së pushtetit.

Këtë gjë e bën përditë pushteti i gënjeshtrave, me tërë makinerinë e propagandës së egër.

Sepse nuk e do të vërtetën. Dhe siç dihet historikisht, gënjeshtra e pushtetit, është më e rrezikshme se çdo lloj gënjeshtre tjetër. Më e rrezikshme se gënjeshtrat e mediave, e opozitës e të dreqit e të birit, sepse është gënjeshtër e fuqisë së pushtetit që mund t’i mbivendoset krejt shoqërisë.

Është e vërtetë se Kosova ka humbur miliona euro për shkak të sanksioneve të perëndimit dhe më keqja, vendi ynë sot ka imazhin më negativ në rajon, si një vend që ngulfat konceptet themelore të demokracisë perëndimore.

Por, kryeministrit tonë i duhet një lopë patriotike për ta mjelë, e meqë i është shterë ajo lopa patriotike e temave për flamurin, bashkim kombëtar e dokrra tjera, ai ka nisë një mashtrimi të ri: për veriun.

Veriu është lopë patriotike për t’i magjeps elektoratin e për të stimuluar një patriotizëm të stisur.

Në historinë politike, nuk mbahen mend ata politikanë ose parti që kanë fituar përqindje të mëdha votash, por mbahen mend ata që kanë lënë vepra të vërteta.

Ne, ketër vite po i lëmë prapa dhe trashëgimia e kësaj kohe janë tonelata urrejtje, përçarje dhe rezultatet më negative të historisë sonë të re.

Kurti përditë po dëshmon se është politikan populist e primitiv dhe si plot të tillë do të përfundojë në anën negativet të historisë.

Me qasjen e tij e standardet aq të ulëta të menduarit për Res Publicen, ai është kthyer në një barrierë të madhe për shëndetin politik të vendit tonë dhe për zhvillim të demokracisë.