Albert Habazaj: Dadë Xhemos me 7 vajza dhe Nazos

Dadë Xhemo Dautaj me 7 vajzat dhe fëmijë të tyre

DADË XHEMOS ME 7 VAJZA DHE NAZOS

Nga Albert HABAZAJ

Në Tërbaç, ku kemi rrënjët…

Në kujtim të heroinës së heshtur tërbaçiote Xhemo Dautaj, nënës së 7 vajzave të rritura bonjake, sepse babain e tyre e goditi vetëtima tek punonte në fushë të Bramyshnjës, Tërbaç, më 24 korrik 1964. Dhe nënë Xhemua si sorkadhe, që s’e njihte fjalën lodhje, me ditë pune në kooperativën e asaj kohe, i rriti me sakrifica të mëdha, pa iu ankuar kujt dhe i nxorri në dritë Të Shtata si 7 drita…

Aromë e gjenezës sime

Tërbaçi me shumë kujtime,

Tërbaçi im, ku kam rrënjët

Ku kam Babën, Nënën, këngët.

Vij te shtëpia, te varret

U flas, po s’më bëjnë o,

7 male në shpinë me halle

Qysh i mbajte, moj nëno?!

Shoh fotografitë dhe hesht

Pres ndonjërin të më vijë,

Do vini, a të vij vetë

Plakur unë, qaj si fëmijë…

Iku baba shpejt, s’pa gjë

Ne të vogla - pa baba,

7 vajza dhe shtëpinë

O nën’, vetëm ty t’i la...

Rriteshim ne, ti si flutur

Fluturoje, s’njihje moshë

Natë e ditë, duke u lutur:

“Kokat tuaja shëndoshë!”

O nëno, me mall ngarkuar

Vijmë me shpirt të përvëluar.

Në Tërbaç, ku kemi rrënjët

Frymën, gjakun, nderin, këngët…

Nazo Dautaj me veshje popullore vajzërore, 1978

Nis këngë, loti pa tharë!...

Tek guri, tej këndit të shtëpisë,

Ku ulej shpesh pas pune imatë,

Ku kam nënën, tek hojet e mirësisë

Mbush me urime për shëndet e fat.

Dhe gëzon si e vogël, fluturon si flutur,

Tek shtëpia jonë, sipër në fshat,

Kur i vemi, si ajo s’ka më të lumtur,

Na vështron si të vegjël, ka mall e merak.

Unë ulem tek ai gur, si fat perëndie,

Se shikoj pak metra më tutje, tek nis e zbret,

Ku iku babai me gërshërë të hardhive,

Tek krasiste rrushin, që atë vit bëri det...

Ulem në gur dhe ngrihem në këmbë,

Pres marsin të çelë kumbulla e ftoi,

Hedh sytë nga malet ta nis atë këngë,

Bujare Çika dhe Tranajoi...

Ta nisim, o Nazo bashkë këngën

Me Pesën, si gjysmë shekulli më parë,

Ti, Trime, s’e ke as babën, as nënën,

Merrja këngës me lotin pa tharë!...