E diele, 21.07.2024, 04:56 AM (GMT+1)

Kulturë

Syrja Kurti: Ikja e vitit

E marte, 29.12.2015, 02:04 PM


SYRJA KURTI

IKJA E VITIT

Cikël poetik

 

Ikja e vitit

 

Po ikën i lodhur, i kërrusur ky vit

mbahet fort në shkop se mund të bjerë pa të

i kanë mbetur këtu dhe fare pak ditë

aq sa dhe po të dojë nuk ndryshon më asgjë.

Punë të bëra keq, të tjera të parealizuara

nuk diti a nuk mundi dot, të ishte më i butë

ditë mbushur plot dhimbje e tek tuk të gëzuara

me pak caste të paqta, me shumë uri dhe luftë


Do më pëlqente të kishte thënë më shumë të vërteta

dhe disave mirë tua kishte treguar vendin

mos të lejonte muajt të mbusheshin plot me gënjeshtra

dhe në ditët e tij njerëzit, më shumë veten të gjenin.

Por nuk mundi dot dhe i kërkoj pak si tepër

se të drejtën e gjykimit për të ndoshta s'e kam

vetëm nëqoftëse si ai e transformoj edhe veten

të bëhem dhe unë vit i kalendarit gregorian.-(1)-

Ik dymijëepesëmbëdhjetë, i zvarritur nga mundimet

dhe thuaji dicka atij tjetrit se ndoshta më mirë do sillet.

-(1)- Kalendari që ne përdorim quhet i tillë për nder të Papës Gregori që e futi në përdorim kete kalendar..

 

 

Në bar "Bukowski"

 

E takova këtë fundvit Bukowskin në Durrës ,-(1)-

doli në derën e xhamtë dhe më ftoi brenda të hyj,

ja pashë fytyrën brenda gotës së birrës dhe shkumës

ja ndjeva praninë kudo në barin me emrin e tij.

Më tha vetullngrysur"Bëre mirë që hyre"

të prisja, sepse e dija që do të vije një ditë

madje mund të ftosh për të pirë dhe ndonjë lavire

por vetëm kujdes se mos të vjedh poezitë."-(2)-

"Duhet pranuar ashtu si të vjen kjo jetë

dhe keq nuk bën sikur të kthesh ndonjë gotë

shijoje kohën në cdo qelizë të saj o poet,

se sido që të sillesh , prapë do të shajë kjo botë.

E takova Bukowskin sot në barin me emrin e tij në Durrës

por nuk e di nëse qeshte apo skërmitej mes shkumës.

-(1)-Në Durrës ka nje bar me emrin e poetit te madh

-(2)- Bukowski ka nje poezi te titulluar"Lavires qe vodhi poezitë e mia"

 

 

Bisedë me dimrin.

 

Ti dimër kot e ke që kërkon të mbahesh hijerëndë

sepse kështu si po sillesh nuk ma fut fare frikën

s'të ndjej dhe s'po më tremb me praninë tënde

se vetëm si në dhjetor nuk po më ngjajnë ditët.

S'të dija gënjeshtar por shumë më burrëror

ndaj bëj atë që duhet dhe mos u sill ndryshe

mos na jep ditë të ngrohta sikur të jemi në shtator

se duam dhe pak ftohtë për të pritur Babagjyshin.

Ndaj sillu si një burrë, bëje tamam dhjetor

na sill të ftohtë krishtlindjesh, ndoshta dhe pak dëborë...

 

 

Galaktikë tjetër

 

Ti më thua e cuditur se si iku edhe një vit

sa shpejt erdhi koha të bëhej gjysh me mjekër

por të them të drejtën unë s'e mas si të gjithë

se kam një sistem dhe një galaktikë tjetër.

Sistemi im s'ka ditë treqindegjashtëdhjetëepesë

as muaj dymbëdhjetë, as katër nuk janë stinët

kur ti ndrin si diell, për mua është pranverë

dhe kur 'të zënë retë, këtu ka vetëm dimër.

Për mua është pranverë dhe numëroj vec ditët

kur rrotullohet rreth teje sistemi im planetar

ndërsa kur nuk je ,s'i numëroj as si shifër

dhe as kohën, as stinët , s'i shënoj në kalendar.

Në fakt ështe pak si e cuditshme galaktika ime

por mua më pëlqen dhe as ti s'ke kundërshtime....



(Vota: 1)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora