Qazim Shehu: Kripë e mëkatit

KRIPË E MËKATIT

 

QAZIM SHEHU

 

Shkulmet shkumëzojnë,

Dhe kur shkulmon bari

Uji ndizet nga zjarri.

Ndaj rrëshqet e shket

Me zjarrin e barit,

Shkon pushon në det

Merr kripën e mëkatit.

 

 

GRATË E DASHURUARA

 

Gratë e dashuruara nuk shihen kurrë

Ato rrinë në ajër,

Ndaj ajri na bëhet më i trëndafiltë

Ditët ecin me ritmin e kërkimit,

Në oshëtimë të pritjes na shpërthejnë si minë

Kur nuk u gjejmë fitilin…

 

 

NJË GOTË VERË

 

E pi një gotë verë,

Për shëndetin e përroit tim

Që dha ujë për pjergullën,

Për stinën si bekim,

Për vrugun që nuk erdh;

Dhe natyrisht,

Për dashurinë

E përroit,

Pjergullës

Stinës,

Shkrirë në lëngun e kuq,

Uritës…

 

 

NË TAVOLINA KONFERENCASH…

 

Në tavolina konfrencash shpesh

Derdhen aq fjalë sa,po ti mbledhësh,

Me to mund të bësh një ledh

E mbi ledh të rritet një numër pemësh.

Ato pemë nuk mund të çelin lule

Kokrra ,kuptohet,jo,

Ne s`rrimë pa dekorin e tyre,

Në fatkeqësi konferencash jeta shko…

Gjak dështimesh kapilarëve të mburrjes

Vërsho…

 

 

DËSHIRA

 

Në rrënjë të stërmundimit të dëshirës

Mbërrin zëri im,

Rrënjët nga trualli i cmirës kanë lëvizur

Dëshira kërkon pak pushim…

 

 

KAPËRCIM

 

Vrapoj të sjell më afër zemrës

Më ngjan përherë ke mbetur jashtë,

Me zjarrin e dikujt ti i afrohesh ëndrrës

Duke më lënë si prill pa maj…

 

Nga prilli hyj në korrik,

Dhe ti hyre në tetor,

Të ranë gjethet, tani prit

Sa të gjej majin mizor…

 

 

ETYD

 

Mbi fytyrë të malit  një shami reje ra

Lotin t`i fshinte,

Aty ku reja ra, guri u ça

Dhe lulja e lotit mbinte…

 

 

PARA FATEVE TË MARRA

 

Bota mbetet e panjohur, përderisa

Të uriturit shtohen,

Pasuria veten e ha,

Dhe paratë s`i mbarohen..

 

Një vetëngrënie apokaliptike pa dëm,

Një gërryerje pa humnerë,

Të varfërit shtohen, kjo nuk shkon,

Kjo botë po mban erë….

 

 

SHPËRPJESTIM

 

Detet e njeriut e gjejnë një valvul shkarkimi

Në zemrën e tij.

Kaq të mëdha detet, zemra kaq e vogël,

Lojën bën të rëndë;

Mbulon detet dhe tokën,

Botën mban në këmbë…