Kulturë
Zog Hysenaj: Grrithi vitet e rinisë
E hene, 24.03.2014, 08:44 PM
Zog HYSENAJ
Grrithi vitet e rinisë
Numëroj yjet n’faqe t’qiellit
Për me gjet emrin e shkruar,
Të betohem n’dritë të diellit
Shkrojna emri n’yje t’shndërruar.
N’qiell të natës të qëndisur
Nëpër yje ndritësuar
Më tremb nata cërr-cërr-isur
E shoh veten duke shkruar.
Zhagis lugën n’fund t’kusisë
Tue krue rreshkat e tamlit t’bardhë,
Gërrithi vitet e rinisë
Nga bjeshkët vargjet m’kan’ardhë.
Nëpër hënën drapër kthye
E shikoj dritën e diellit,
N’rreze t’diellit ulur n’hije
E shkruaj emrin e këtij librit.
Mbi gurë të malit gëdhenda kujtimin
Përmbi gur të malit e gëdhenda kujtimin
Në bjeshkët mija me shpirt unë e vara
Në gurrën e kronit e putha burimin
Gëzimet i njoma mbi buzët e thara.
E vara këngën mbi degë të gëdhenit
Me boçat e pishës me fëmijët luajta
Me degën e pishakut te buzët e vërganit
Kumonët e deshëve me krismat e buta.
Në gërdhatën e nënqiellit u shtriva e pushova
Mbi përçukun e gojfiltë kokën e mbështeta
Ndejta me zanat, me qiellin u mbulova
Në mendime e vuajtje i mbyllur unë mbeta.
Në varg të karvanit në bjeshkë unë u ngjita
Në atë bjeshkëmirën, tek tela me stane
Telë më telë e majë në majë shëtita
Në imshta, në zhare, kreshtave n’ato shpate.
Dhe e mbusha tasin me të bardhen borë
Ia hodha tamblin mjel prej deles rudë
E përkëdhela edhe verganin me këmborë
Edhe përsheshin me tamël e hëngra në bludë.
Te orteku i borës gratë kur shkuan
Unë vetë i pashë të veshura aq mirë
Shamija të bukura gjitha bojna-bojna
Pushuan te pisha e madhe me rrëshirë.
Eh, sa kujtime në mendje më mbetën
Që lotët në sy po më rrjedhin sot,
Ashtu si në film njeriu shikoka jetën
Mbushur me kujtime të mbështjellura me lot.
Bardhësi shpijat gjallnore
Me opingat gomëzuar
Me të moçëmen përzier
Shkalloret e gurta lëmuar
Mundimi me shpirtin zier.
Që nga vuajtja deri n’vuajtje
Nga fillimet n’lashtësi
Nga betejat, luftës tutje
Gurishtoret bardhësi.
Bardhësi shpijat gjallnore
Rrënjtë e tyre n’shkëmb muruar
Faqja e shkëmbit gurë rrasore
Daltuar e emrat shkruar.
Janë shkruar vjettë e mija
Faqe shkëmbi-rrethatorë
E skalitur historia
Rrathë- brezat shekullorë…
Babait tim
Një fytyrë e ëmbël me rrudha
E përvuajtur, krenare,
Qeleshen e bardhë mbi kokën e thinjur,
Mbi rudhat e ballit shkruar fisnikëria,
Rrall-herë gëzimet andej nga ti kaluan
E ndoshta hiç-herë
Ose nëpër ty u shndërruan, ndonjëherë
E me duartë e plasaritura i përcolle,
Në ato rrudha
Kujtimet mbjellur një shekull më parë
Plot 100 vjeçare.
Heshtja e heshtur, varfëria dhe vetmia,
Vuajtje, njëherësh me lindjen
Të panë sytë,
Mbi shpirtin tënd, kryet lart krenaria,
Me rritjen dhe pathyeshmërinë ngjitur
Portreti yt,
Prej Malësori,
Në sytë e tu, sinqeriteti dhe urtësia
Babai im fisnik...
Shuplaka m’u dogj.
M’u derdh malli
Si gacat e prushit
E në grushtin tim, kup-kup kërcasin “në mot”,
S’e di sesa do të më zgjasë ky mallë
Kur do të ikë nga unë
Kur do të më çlirojë.
U ndodhën dy bredha trupgjatë matan dritares sime
Që më fërfërijnë lehtë e sikur fluturojnë,
Përmbi çatitë e Bad Kisingenit
E kujtimin ma zgjuan,
Atë kujtim plot dhimtë.
U deshën këto dy bredha dhe cicërrimat e zogjve
Që po m’i përkujtojnë çdo ditë ato gdhëishta,
Ato ahishta e ato imshta
Që po më mbushin frymë,
Eh, ku s’po më çojnë
E ku po më kthejnë?
Aty ku nuk desha të isha,
Aty ku vetëm një dritare kam përpara syve
E atë bredh kujtues, që po më sheh me dhimbje,
Nëpër degët e tij, qielli si i grisur po më duket
Si i pandlavun
E nëpër to, shiu i lotëve të mi pikon.
Kur zogjtë flatërimin sosin aty,
Si era vijnë tek unë e prapë largohen
Pa më thënë asnjë fjalë
Pa më dhënë asnjë lajm,
Përmbi kryet tim nisin flatërimin
Drejtë shtegëtimit hej se ku.
Me mua, pse nuk rrijnë?!
Ikin e si atë gjethe bredhi po më marrin
E bash si këto tufa bredhi dridhet kujtimi,
Se u bënë e shkuan si hije gjashtëdhjetë vjetë.
Gjashtëdhjetë vjet që fluturon ai kujtim
Lundron në qiellin e pafund
E s’kam sesi ta di se në cilën shkallë
Ka humbur,
Ku do ta gjej e kurë,
Ndoshta pas gjashtëmijë vjetësh do ta shoh…
Bad Kisingen 6 shtator 2010
Malli i madh lisin e tha
Oj kosovë m’dogje prej mallit,
Bash si i digjet zemra djalit,
Gjithmonë djegë asht zemra jonë.
Malli i madh lisin e tha,
Dilnim n’maje me u pa ju,
Por e keqja një t’mirë e ka
Njeri e ndjek mallin me hu.
Tash kur vijm’, mallin e shuajmë,
Zogjt na thrrasin për me folë,
Për me u pa tash ma nuk vuajmë,
Sa her’ duam me ardh n’Kosovë.
N’at Gjakovë un’ vi e rri
N’pik t’sabahit dielli kur bjen,
Flas me veti e flas me ty,
Kthehna e kqyri at Shkelzen.
Mall prej bjeshkve ku unë rri
Kangatartë që i knduen Kosovës
N’zemër mbeten që n’rini
Kangatartë e mdhej t’Gjakovës.
Disa janë, disa nuk janë
Gjithsesi me ta unë rri,
Tash Kosovs s’i thomë “matan”
Gjithandej i thomë Shqipni.
Që unë emrin ja u kam ndie,
Dal pi kafe majë Çabratit
N’mahall t’Qylit unë bie.
At’herë i marr mahallat marë
Tuj e
Ismet Pejës po i çova fjalë
Me u takue n’Mahall t’Honkes.
Prej aty n’Mahall t’Cullakve
Tutsh se marr n’thue pa hiri,
Nisna ngjitna kadaldalë
Dal n’çabrat Gjakovën kqyri.
Pemëshpirti
Me një sharrë e ndonjë daltë hekuri
Edhe me pyka druri e premë atë lis shekullor,
Një gjethe rrëshqiti duke rënë në tokë
E shkoj e ra mbi trungun e rrafshët
Gjërë e gjatë u shtri si në shtrat të vet.
Unë, po numëroj rrathët e pemëshpirtit
Me sharrë të prerë
Kur radha e numërimit erdhi te ajo gjethe e verdhë
Gjethe vjeshtore si pëllëmba e njerit
Që duket se thotë:
E kam zanë unë këtë truall.
E shtyva me kujdes të mos ia prish rehatinë,
Të mos ia prish gjumin
Në trupin e vet shtrirë, në vend t’vet.
Eeeeh, sa rrath paska pasë ky lis
Brenda lëkurës së rrudhosur
Të trupit të tij shekullor,
Mbi rrënjët dhe brenda jetës së tij,
Sa sëpata priti e sa rrebeshe u ndalën në atë trup
Sa borërat ndaluan në ato degë
E sa lot shiu rrodhën nëpër ato gjethe?
Në rrathë lisash, jeta ime shkruar
Vitet e mia brenda asaj lëkure
E në ato gjethe
Fryma ime pikon mallin,
Çdo gjethe nga grimë të shpirti tim
Plot rrathë
Ardhë nga rrënjët e tij
Prej stërgjyshëve të mij trashëguar
Pylli i shekujve të mi
Rradhitur prej brezash
Vizuar prej rrathësh…
2013, sa u ktheva prej ashtës së Rrogamit.
Po më thërret gurra
Diku larg humbur prej vitesh
Moi çikëëmira, a po rritesh.
Tutsh se ndien Sali Syla
Edhe bjeshka po e thërret vrritarin
Bukur kndojnë ata bylbyla.
Ul në shtrungë po e mbush kusinë
Ma çon kryet kur e ndien djalin
Kah i bjen fyellit mbi Meçinë.
Me za t’amël po i thërret dada
Kur e ndjell po ja lpinë gishtin
Lumja ajo për duratë e bardha.
Maja majës çka i ka thanë
G’dhënd mbi lisa e kam rininë
Vijnë vrritarët po i ngjesin gjanë
Përmbi gur përmbi çetinë
Përmbi renë që sjell vetimë.
Përmbi qiell mbi retë e holla
Përmi ne po vijnë sokola
Përmbi ne po fluturojnë
Ndjellin fat mbi bjeshkët tona.
Na bajn hijen përmbi stane
E po kqyrin si gjë prej fatit
Kur po “fallen” n’telë t’ Lugbatit.
Janë memorje k’to kujtime
Dal pre zemrës flakë i ri
Ardh prej kohësh në mendime
Për me i shkrue aq sa t’di.
Zog Hysenaj 2009
ora 00.05 në Tiranë
E pyes veten, më pyet vetja
Shumë herë e pyes veten për atë vend ku unë linda
E shumë herë mendoj për të,
Shumë herë i them vetes
E shumë herë më thotë vetja mua.
Kthehem prapë dhe e pyes:
Si jeton njeriu në atë shpat të Geg-hysenit,
Krejt me pemë
Krejt me livadhe e ara
Krejtë të rrethuara me pyje e
Malet përmbi të, si roje
E vetja më kthehet e më thotë:
Kemi lindur e rritur aty
E aty-hja është vendi më i mirë në botë
Është më i miri.
Aty, e vetëm aty, e kërkund tjetër
Ngihesh frymë sa të nxanë mushkëritë
Ngihesh me ujë të ftoftë gurre,
Aty, nuri i fytyrës të zdrit.
Aty flasin kullat more djali i Gegysenit,
Flasin dy shqypet tona, simbol flamuri
A thua se ato janë edhe simboli kombëtar:
Shqiponja me dy krena
E bash aty e kanë shpinë-në Kala t’Lekës
Në Kodër të gjytetit të dyja
Bash përtej shpisë time,
Përditë pershëndeten me geg-husenasit e mi.
Aty, flasin malet
E takohesh me erën,
Rojen e shpirtit tim,
Që më merr këtu e më çon atje sa për mall
E prapë më kthen këtu tek shtëpia
Në Kodër të Qytetit.
Eh, po më shkon mendja se qenkam unë
Qytetari më i parë i kësaj bote,
Kur i shoh themelet qytetase
Të fshatit tim, me emrin qytet.
Do të shkruaj
Më të bukurat vargje mund t’i shkruaj për ty,
Siç do të shkruaj për më të mirat ditë tona,
Drithërueshëm do të shkruaj për të kaltërit sy,
Nëpër qiell sillet e më vjen ujëbukura Valbona.
Sa do të dëshiroja, të më doje nganjëherë,
Ndonjëherë të fluturoje ndër krahët e mi,
I dua sybukurit tu, mbi të mijtë mbjellë,
Në sytë e mi malli për bjeshkën, për ty.
Shkruaj vargjet se për ty, dhimta më dhemb
Dritë të bën zhurma në natën e yjësuar,
Kur vjen pranvera rrethohesh plot pemë,
Shkruaj për ty e s’ngopen duke shkruar.
Shpirti im vështron flladin, zërin tënd çdo natë,
Kah dirgjesh, sytë m’i ushqen me tërë shikimin,
Krejnisht gjarpëron Grykës shtati i Yt i gjatë,
Herë si gërshet i malësisë, përshpinë lëshuar
Nëpër shpatullat e saj të shtrirë deri në tokë,
Herë më dukesh vaj i vashës me djalin dashuruar,
Valë loti dirgjesh faqes nga syri më i bukur në botë.
Nuk janë vargjet e fundit që Ty do të t’i shkruaj,
E fundit është dhimbja që përditë më shkakton,
E vetmja është vend-lindja që më bën të vuaj,
Monument i malsisë, lumi ynë, Valbonë.