Ramiz Selimi: Emigrimi sot produkt i Tenderëve

Bashkimi Europian nuk pranon emigrant nga Kosova

Emigrimi sot produkt i Tenderëve, Haraçit, Gjyqësorit,..!

Pasuria shoqërore u shndërrua në gërmadha, donacionet e BE-s  kaluan në xhepat privat,  prodhimet vendore dhe kompanitë u terrorizuan në emër të tregtisë së lirë dhe haraçit. Kush janë ata që privatizuan, tenderuan, terrorizuan (Haraç) dhe tregtuan, zonja Ministre?

Shkruan Ramiz Selimi

Po mundohem në mënyrën më të thjesht të mundshme ta shkruaj ketë mendim, që ta kuptojë secili qytetarë, se pse po ndodhë kjo gjendje e rendë ekonomike në Kosovën tonë të dashur. Politika e tanishme që bënë pjesë edhe një pjesë e opozitës, çdoherë e kanë paraqitur dhe e paraqesin situatën të mirë e me trend zhvillimi. Realiteti po e vërteton të kundërtën, janë mbushur të gjitha shtëpitë për pranimin e azilkërkuesve me emigrant kosovarë, duke filluar nga Hungaria që është bërë e njohur edhe për opinionin kosovarë, e deri në të gjitha shtetet e Bashkimit Evropian . Situata nuk do të ishte aq alarmante sikur perëndimorët të mos kapnin për “vesh” Ministren për Integrime Vlora Qitakun dhe  Ministrin e Punëve të Brendshme Bajram Rexhepin.

Kërcënimi dhe kërkesa për mos emigrim janë tallje me ketë pjesë të popullit, (e që në realitet duket se është shumica e popullit) pa u afruar atyre alternativa të mbijetesës dhe perspektivës.

Kishte me qenë e udhës dhe njerëzore që Ministrat e tanishëm por edhe opozita të përgjigjen në këto pyetje: Kush e bëri privatizimin e pasurisë shoqërore (tenderë) dhe kush i përfitoj atë, për ti bërë ato burime në gërmadha? Kush i përfitojë donacionet (prapë tenderët) e Bashkimit Europian dhe cilët persona morën ryshfet për ndarjen e tyre? Kush ju kërkojë Kompanive (me perspektivë zhvillimi) haraç për të pakësuar punësimin me qëllim eliminimin e tyre nga tregu? Kush e deklasoj prodhimin vendor  në emër të tregtisë së lirë? Kush po i sjell prodhimet e huaja bujqësorë në Kosovë, që po detyrojnë bujkun tonë të emigrojë? Cilët gjyqtarë po favorizojnë politikën në raste të ndryshme kontestuese?

Ministra të dashur këto pyetje duhet analizuar mirë, pastaj të dilet para opinionit për të ju kërkuar qytetarëve që të mos emigrojnë. Pse nuk thoni njëherë: ”Të dashur qytetarë ne i kemi kuptuar hallet dhe problemet e juaja, tani kemi marr vendim që të gjithë politikanët do të ndajmë të ardhurat, honorarët  tona me familjet skamnore, secili nga ne do të ketë vetëm një pagë, secili nga ne do të heq dorë nga pushimi, ato para të ju dedikomë familjeve të varfra, e plot forma tjera”! Por, a mund të veproni ju kështu? E di, ketë nuk mund ta thoni, sepse ju nuk e keni kuptuar akoma thelbin e funksionimit të një shteti.

Po harrojnë Qeveria dhe Opozita se ata janë shkaktarët e kësaj shpërngulje me keqpërdorime të shumta të tenderëve, haraçit, intervenimit në gjyqësor, me një fjalë ata janë ndarë nga realiteti dhe shohin vetëm botën e tyre, është mirë që të marrin kontakt me popullin, mu sikurse kryetari i Indisë Nehru  që kishte thënë: ”Tani e kuptova më shumë se kurdoherë, se sa kishim qenë të ndarë nga populli ynë dhe sa kishim jetuar, punuar e agjituar në botën tonë të pasur, por shumë të vogël në krahasim me popullin”.

Emigrant, vendi i punës suaj është në xhepin e qeveritarëve!

Nuk u realizuan pritjet e mëdha të kosovarëve në procesin  privatizimit të ndërmarrjeve shoqërore për të sjellë zhvillim ekonomik dhe zbutje të gjendjes së vështirë ekonomike, për shkak të nepotizmit dhe korrupsionit. Ndërmarrjet shoqërore ju falën miqve dashamirëve, militantëve duke i shndërruar ato në gërmadha të pavlefshme. Me ketë vendet e punës së qytetarëve u futen në xhepin e politikës.

Kishte shumë testime nga jashtë për të provuar seriozitetin e kosovarëve në bërjen e biznesit. U konkurrua në tenderë dhe projekte të ndryshme nga kompani të huaja, por atyre asnjëherë nuk ju besua puna, për shkak të lakmisë së madhe në përfitimin e pasurisë. Kompania e madhe nga Klagenfurti( Austri) “Kropfitsch”, pas investimeve (privat) të mëdha që bëri në vitin 2009, u shantazhua në të gjitha format nga partneri, qeveria dhe gjyqësori, në mënyrë që pasurinë e investuar ta përfitojë një person i caktuar. Prandaj, nuk qëndrojnë mendimet e ekspertëve kosovarë se mungesa e investitorëve nga jashtë  solli ketë krizë ekonomike, ata nuk munguan, ne i larguam.

Ekonomistët, Menaxherët por edhe politika e dinë se Bashkimi Evropian ka dhënë donacione, grante e subvencione mbi 7 miliard €, numra oficiel që defilojnë në faqet zyrtare për donacione, ketë ma ka vërtetuar edhe miku im Deputet në Parlamentin Evropian Dr. Paul Rübig, i cili është edhe i dëshpëruar me situatën e tanishme ekonomike. Me investimin e këtyre mjeteve në të gjithë sektorët është paraparë që të gjenerojnë shumë vende të reja të punës. Por, i gjithë ky zhvillim i paraparë u kap nga një grup njerëzish, të cilët nuk lejuan në asnjë formë që të fitojë projekti më i mirë. Ata projektet i shpërndanë në farefis, miq, dashamirë, militant një nepotizëm i paparë gjerë me sot. Për pjesën tjetër që lakmonte parat, ishte korrupsioni ai që ju kryente punë, duke ndarë 30-50% të shumave me njerëzit kompetent. Projektet serioze me Menaxher të provuar në perëndim u refuzuan.

Në shumicën e rasteve, hapja e tenderëve nga partitë në pushtet ishte vazhdimësi e lojës me buxhet për të mashtruar qytetarët.

Kompani mirë të organizuara u detyruan në emër të lirisë të paguajnë haraç, ato pak fitime të mundimshme që i fituan, u plaçkiten në emër të partive, a thua nga kush? Vallë, mos erdhi Milloshi dhe i organizoj plaçkitjet? Rezultat i të gjitha këtyre është emigrimi i qytetarëve, për të kërkuar një jetë me të mirë. Adnan Bajraktari tregon se:” Kam dhimbje të madhe për vendlindjen, u ktheva dy herë, njëherë e ndihmova Kosovën në luftë dhe herën e dytë pas shpalljes së pavarësisë, ku e humba të gjithë investimin e bërë. Treg i egër është Kosova thotë Adnani, e mbylla sepse nuk me linin të punojë i qet. Pasi mora SMS se me duhet të paguaj 20.000 €, frika me ishte futur në palcën e kurrizit, përsëri mora rrugën e gyrbetit

Zonja Ministre dhe Ministra tjerë vendi i punës së këtyre qytetarëve në ikje gjendet në xhepin tuaj privat, gjendet në xhepin e miqve tu Ministra e Militant, Tregtarë të Pozitës e Opozitës që zaptuat të gjithë tenderët dhe zhvilluat haraçin, për të kapur zhvillimin peng.

Është momenti fundit që Qeveria të mendojë seriozisht për qytetarët e vet, të largohet nga jeta luksoze, të merret me qytetarin me anëtarët e shtëpisë së tij, mos të lejojë mbylljen e shtëpive për shkak të kushteve ekonomike, në kohën kur shtetet e Bashkimit Europian nuk pranojnë qytetarët kosovarë, por të solidarizohet në format sociale me popullin, të merret secili rast social në shqyrtim dhe konsideratë. Të ndalet emigrimi, gradualisht të fillojë riatdhesimi, të ndihemi më në fund krenarë me shtetin tonë.

PS: Autori është Nënkryetar i Agjensionit për zhvillimin e Ballkanit