LUFTA E KINGJAVE

Parodi rapsodike:

          LUFTA E KINGJAVE

T’ dielën herët , pa dalë drita –

Komandantët kanë dalë në prita ,

N’ sabah herët janë përgatitë ,

Për vikend n’ Malësi me u ngjitë ,

Me pi ujë e me u flladitë ,

Kanë marrë pushkët e çiftelitë ,

Me luftue si e kanë traditë !

Kanë marrë armët , janë nisë drejt grigjave –

Luftë të madhe iu kanë shpallë kingjave !

Katundarëve , fjalë iu kanë çue –

Kingja e knojsi me i rekrutue ,

Saç , tepsia me i mobilizue ,

Flija e pite me tëhollue !

Se kur t’ vijnë këtu komandantët –

Mos me i ngue , do t’ ua thejnë dhambët !

Nuse e çika , herët janë çue ,

Kanë hi n’ magje me gatue ,

Flija e pite tue tëhollue ,

Krejt prej zhegut ishin përvëlue !

T’ dielën herët, kur doli drita –

Kingja e knojsi janë ra në prita !

Luftë e rreptë paska shpërthye ,

Shumë e kingjat janë mbetë pa krye !

N’ tana anët po kërset pushka –

Shumë e pulat janë mbetë vejushka !

Gratë e shkreta u dogjën n’ diell –

Shumë e magjet janë mbetë pa miell !

Knojs e kingja çka kanë qëllue –

Në tepsia kanë përfundue .

Qesin trimat si vetima –

Kingja e knojs kanë ra viktima !

Ja kanë nisë n’ bark me i varrosë –

Nga tepsijat që ishin sosë !

Shtrohen sofra dhe rakia ,

Shtrohen kingjat me tepsia ,

Shtrohen pitet bashkë me flija ,

Tambël – orizi dhe revania ...

Kërset kanga e çiftelia ,

Kërset pushka dhe alltia ,

Zjarr të madh mori Malësia ,

U trishtuen gjithë shpenia !

Nuk pushon  zjarri i  alltisë ,

Nuk pushon gota e  rakisë ,

Tanë ty  u gjue me petlla t’ flisë –

Tu rritë ndera i Zoti i shpisë !

Kërset pushka e Cenë Ibishit ,

Tanë ty u gjue me copa t’ mishit ,

Tanë ty u gjue me kofshë të kingjit ,

Ja thyen dhamtë , komandant  Xhinxhit !

Luftë e madhe , u ba hata –

Nuk lanë sorrë pa e gjue n’ hava !

Vajtojnë delet pa kumonë –

Na i faruen krejt burrat tonë !

Na i faruen kingja e desh –

Nuk na e lanë nji burrë për vjeshtë !

Vajtojnë pulat ,  mallkojnë hak –

S’ na e lanë  knues  me knue n’ koçak !...

Kështu mbaroj kjo luftë  kaçaku –

Komandantët i ka rrokë barku ...

I shtinë gishtat n’ fyt me vjellë ,

I japin zor , duen me pjellë !

Der’  sa u kthyen afër qyteti –

Shumë prej tyne janë çkulë nër veti !

Gjilan, më 14.08.2010. Demir KRASNIQI