Cikël poetik nga Anton Marku

Anton Marku u lind me 15 gusht 1971 në Gjakovë. Deri më tani ka botuar katër libra me poezi të cilët janë përkthyer edhe në gjuhën angleze dhe gjermane: ,,Cikloni i Dashurisë’’ (2000), ,,Gjurmë mbi Hije’’ (2002), ,,Dielli i Mesnatës‘‘ (2004) dhe ,,Vizioni Blu‘‘ (2010). Ai poashtu është prezantuar edhe në përmbledhjen me poezi të poetëve që jetojnë në Austri ,, Man fragst mich, ob ich bin‘‘ (,,Pyetem nëse jam‘‘ (2009). Anton Marku është edhe anëtar i Klubit Letrar ,,Gjon Nikollë Kazazi‘‘ në Gjakovë si dhe i Lidhjes së Shkrimtarëve të Kosovës.
 

LETËR DËRGUAR VETVETES

Jeto i lirë

Apostull i paqes

I lindur për qiellin

Në emër të dashurisë

Pranë vetes mbaj

Ngjyrat e shpirtit

Nisu vetëm atëherë

Kur zëri të tradhton

Vijës së kuqe

PA ADRESË

Dhembja ime mbeti atje

Ku gurët i rrokulliste era

Pas lashë zjarr veriu

Që na dogji të gjithëve nga pak

Loti më përcjelli detrave

I vetëm pa askënd pranë

Udhëkryqeve më përplasi

Jetë e shumëzuar me asgjë

Derisa bota po zvogëlohej

Në sytë e mi

AUTOPSI

Eja të flasim

Për të gjitha nga pak

Për aromën e shiut në ikje

Ngjyrat e dritës

Gjurmët e erës

Mes të bardhës dhe të zezës

Ka diçka më shumë

Se sa vetëm bardh e zi

MË FAL

Më fal e dashur

Që aq shumë të premtova

E aq pak të dhashë

Më fal

Nëse netët me mua ishin të gjata

Nëse puthjet ishin krejt çka pata

Të lutem më fal

Më fal

Nëse të dua shumë rrallë të thashë

Nëse ëndrrat në gjysmë t’i lashë

Të lutem më fal

Më fal e dashur

Që mëkatar isha nga brenda

E engjëll nga jashtë

Më fal

Të lutem më fal ...

TI NUK JE MË

Sa afër kam dhembjen

E ty sa larg

Më thuaj si të shëtitëm erërave

Pa ty

E të vdes

Në përqafimin tënd

Jeta nuk më mjafton

As sot as nesër as përgjithmonë

Sa e zbrazët

Gjithçka pa ty