Demir Krasniqi: Krisi pushka krisi kiameti

Parodi rapsodike :

            KRISI PUSHKA KRISI KIAMETI

O, Sheremeti na u çue në kamë ,

Ka vendosë me e ba nji nam ,

Do me e ba nji hallakamë ,

Me ba zhurmë edhe piskamë !

Ka shitë tokë, ka shitë livadhe –

Do me e ba nji darsëm t’madhe !

Bashkë me djem ka hy n’ kredit –

Janë rrasë n’ borxh deri në fyt !

Ka thirrë miq , ka thirrë jarana ,

Ka thirrë shokë, ka thirrë tarzana ,

I ka thirrë tri parë tupana ,

Veshun n’ tirqi me gajtana .

I ka hipë mbi kamiona ,

Shkojnë tuj luejt sikur  çurana !

Po i bien surles Ibish Kamishi –

N’ tana anët kërset bakshishi .

N’ katër anët po bien tupani –

N’ kamë janë çue krejt Gjilani ,

Po e ngreh vallen  Talush Grepi ,

Po martohet  Malush Gazepi  .

Njiqind efa e njiqind  qefa ,

Shkojnë tue knue çikat me defa ,

Mbi dritare e mbi vetura –

S’e bajnë mend kund që ka burra !

Ka qitë para dy flamura ,

Janë vargisë treqind vetura ,

Nuse e çika , gra e burra ,

Shkojnë qytetit turra – turra .

Shkojnë tupanet tuj çalldisë ,

Shkojnë veturat tu i ra burisë ,

Xhurullti po shkon çarshisë ,

Krejt miletin e kanë shashtrisë !

O, krisi pushka – krisi kiameti ,

N’ kamë janë çue  krejt mileti ,

N’ katër anët dridhet qyteti –

Po  banë darsëm   Sheremeti !

Kërset pushka , jehojnë buria ,

N’ hall kish ra   Çeskin Sadria –

S’ po ja zenë kerret çarshia ,

S’ mund po e çojnë nusen te shpija !

Krisi pushka e na u këput teli –

Holl po qet   Bik  Teveçeli !

N’ hall kish ra  Patron  Veseli –

S’ po ja zenë krushqit hoteli !

Banë medet , mixha  Servet :

“Qe sa vjet jam ratë n’ krevet ,

Më ka lodhë kjo dergjë e shkretë ,

Ditë , as natë s’ po muj me fjetë !

U nis lufta, u nisen zjarret –

S’ na lanë t’ qetë paramilitarët !

U mbush qyteti tanke e topa ,

Ditë e natë na dridhej toka !

Kaluen dimna e kaluen vera –

Kurrë n’ këtë vend s’ na u ndal potera !

Përmbi krye – helikoptera ,

Poshtë në tokë na mbyti era !

Naltë në qiell shkojnë aeroplanët ,

Nga minaret – altoparlantët ,

Ditën , natën , n’ mbramje , n’ mëngjes ,

S’ dinë kush lindë , as kush po vdes !

Ditë e natë s’ pushojnë sirenat ,

Ushtojnë gomat , ushtojnë frenat ,

N’ kupë të qiellit kangët n’ vetura –

Tue ba gara gra e burra !

S’ pushojnë zhurmat , bien buria ,

Ndihma e shpejtë e policia ,

Shkojnë zjarrfikësit n’ tjetrën anë ,

Prej poteres , mentë me t’ lanë “!

Gjilan, më 14.08.2010.     Demir KRASNIQI