Demir Krasniqi: Azilanti

Demir Krasniqi:

            AZILANTI

- Këngë kurbeti  –

Azilant , unë kur shkova –

Mirë e pashë se fort gabova !

U pendova ashiqare ,

Fati deshi , s’ pata çare !

            Ah, sa në hall kam ra –

            S’ është kollaj me u nda !

            Me u nda për së gjallë , medet ,

            Trupi mu ka kallë ,

            Zemra m’ digjet n’ mall !

S’ çohet jeta n’ dhe të huaj ,

Jam mërzitë , me mend po luaj !

A thua vjen ndo i herë ndo i gëzim,

Që të kthehem n’ vendin tim ?!

            Ah , sa në hall kam ra –

            S’ është kollaj me u nda !

            Malli më ka marrë , medet ,

Kam lanë nënën plakë ,

Zemra m’ digjet flakë !

E kujtoj me mall vendlindjen ,

Që pa dashtë ia ktheva shpinën !

Ke për mua i ziu kësmet –

Mos me u kënaqë kurrë në këtë jetë !

            Ah, sa në hall kam ra –

            S’ është kollaj me u nda !

            Me u nda për së gjallë , medet ,

            Lotët më janë tha –

            Plasa duke  qa  !

Gjilan, më 1997.