Mihal Gjergji: As rroj, as vdes

Mihal Gjergji

AS RROJ, AS VDES

I ngujuar në burgun e fjalës

As jetoj dhe as vdes (në hapsanë!)

Ndërsa prita ndëshkimin e radhës

M’a grabitën lirinë dhe më vranë

Si në ëndërr më shfaqet “cigarja”

Dorën zgjat të më djegë përsëri

Ky kodosh më i keq se murtaja

Më plagosi dikur në rini

Prita kot, jo një vit, po gjithë jetën

Nuk u mbyt as në Vjosë as në Bunë

Rrodhën vitet, po dhimbjet s’u tretën

Flas me veten, se ju bëni gjumë

Me sa duket s’e qaska as varri

Atë xhind që kafshon pa mëshirë

E shikoj kryeroje te Hadi

Djeg me zjarr edhe lidh me zinxhirë

Vendi im. Meka ime e ndritur!

Ku i ke pelegrinët e tu?

Të kungojnë xhelatët gjakprishur

Ndërsa turmat u bien ndër gju!

(Tiranë, Gusht 2020)