Leon Duhanaj: Zgjedhje demokratike, pa Mitrovicën

Zgjedhje demokratike, pa Mitrovicën

Nga Leon Duhanaj

Zgjedhjet e djeshme të tre nëntorit, si asnjëherë më parë mund të cilësohen si të rregullta dhe demokratike, nëse analizën e bëjmë pa veriun e vendit, i cili kishte probleme serioze dhe ku edhe njëherë u vu në spikamë mungesa e pushtetit shtetëror.

Veriu – është për të ardhur keq se sa indiferent u treguan subjektet politike në vend me ngjarjet që ndodhen atje. Reagimet të cilat vinin nga partitë e mëdha në vend ishin aq të ftohta sa të jepnin përshtypjen se këto ngjarje të shëmtuara që ndodhen në disa qendra në veri kishin ndodhur diku në ndonjë kontinent të largët e jo në Kosovë. Vërtet është e pakuptueshme indiferenca e aparatit shtetëror e treguar në raport me veriun e vendit. Kjo na le një shije të hidhur dhe na jep të kuptojmë se Mitrovica dhe komunat veriore ende do të vazhdojnë të jenë instrument i qeverise së Beogradit për destabilizimin dhe shantazhimin e Kosovës dhe shtetësisë së saj .Mendoj që paraqitja e liderëve vendas ishte dashtë me qene shumë ma energjike. Edhe njëherë u vërejte gjendja e mjerueshme e popullatës ne veri të vendit e cila ka qene dhe ende qëndron të jetë peng i strukturave kriminale atje.

Përsa i përket procesit zgjedhor në pjesën tjetër të vendit, ishte në nivel, ku nuk u vërejte ndonjë problem që do të ndryshonte mbarëvajtjen e procesit.

Përsa i përket arritshmerisë së subjekteve politike në përgjithësi mbeten të njëjta. Edhe njëherë u vu në spikamë se votuesit edhe nëse kanë ankesa të vazhdueshme gjatë gjithë legjislaturës, prapë bien nën ndikimin e makinerisë së financuar nga subjektet e mëdha në vend. Përpos që fushata ishte e qetë nuk u vërejt ndonjë program cilësor. Oferta për këto zgjedhje ishte uniforme , nga të gjitha subjektet, me premtime tashme të konsumuara vazhdimisht neper zgjedhjet lokale. Debatet e organizuara nëpër media në vend me përjashtime të vogla ishin në masë të madhe një farsë, një shou qesharak por assesi një mundësi e mirë për të shpalosur ndonjë projekt politik.

PDK-edhe përkundër faktit që ka qenë partia me e kritikuar dhe më shumë probleme, nëse përjashtojmë dy komunat Malishevën dhe Drenasin, ku iu ndanë dy iniciativa, duke i shkaktuar dëme të konsiderueshme në Malishevë duke i marrë pushtetin, ndërsa në Drenas duke i marre nga votat e përgjithshme popullore, në përgjithësi kanë arritur që me një fushatë agresive ta reduktojnë një rënie me të madhe, e cila, nuk do ishte edhe befasuese.

LDK-sipas të gjitha gjasave do të dal partia e parë në vend, ky rezultat ishte i pritshëm, edhe përkundër faktit që LDK ende nuk ka arritur ta përmbyll një proces i cili do të trajtohej si një reformë e plotë. Ende vërehen disa Komuna ku ka ngecje serioze dhe ku kërkohen reforma rrënjësore, duke inkuadrua gjak të ri në to. Në përgjithësi LDK mund të konsideroj këtë trend si pozitiv dhe ta shfrytëzoj maksimalisht për të ardhmen. Assesi nuk mjafton ky rezultat në mënyrë që të ndihen komod në ndonjë mënyrë. Ende ka një proces i cili mund të ketë epilog të papritur për LDK-në duke përfshirë këtu edhe Prishtinën . LDK ka ende nevojë për forca të reja, trendi pozitiv është një shenjë nga elektorati i cili tregon çartë se ka simpati për këtë subjekt, por që për ta përfituar të terin ende duhet punë dhe reforma.

AAK-pritja e cila ndoshta kanë pasur, për një ngritje të ndjeshme në vend, nuk u realizua, madje edhe përkundër ngritjes në nivel të përgjithshëm, vërehen rënie ne disa komuna ku ka rrezik serioz për ta humbur pushtetin. AAK ënde nuk ka arritur ndonjë reformë të dukshme, edhe përkundër zgjedhjeve të brendshme aty ënde dominojnë forca të ricikluara të cilat autoritetin dhe fuçinë elektorale nëse e kanë pasur ndonjëherë , tashmë e kanë të humbur, e në demokraci autoriteti matet ekskluzivisht me anë të votës së qytetarëve.

Në AAK vërehet çartë mungesa e një kryesie qendrore, më përjashtim të dy tri figurave duke përfshirë edhe liderin Haradinaj, të cilët kanë qenë aktiv në zgjedhje dhe mund të thuhet që kane pasur ndonjë ndikim në mbështetjen e lidërve lokal. Të tjerr nuk u vërejtën dhe nuk mund të thuhet se kanë arritur që përmes ndonjë autoriteti qendror të ndikojnë ne ngritjen e nivelit të mbështetjes ne nivelin lokal, kjo vërehet shumë çartë edhe në rezultatin në Prishtinë ku edhe kësaj radhe u vërejt një paraqitje e plogësht dhe e vetmuar e kandidatit Besnik Tahiri. Edhe në AAK vërehet nevoja e madhe për njerëz të ri, të cilët do t’u bëheshin konkurrencë e pakalueshme figurave të shumta të cilat tashme mund të cilësohen si të praruara në politiken kosovare.

L. VV- euforia e zgjedhjeve të përgjithshme e cila u kishte shërbyer pozitivisht, për dy arsye; njëra duke shfrytëzuar kartën nacionaliste dhe tjetra duke shfrytëzuar varfërinë dhe pakënaqësinë e madhe në vend dhe duke instrumentalizuar në masë të madhe rininë. Kësaj radhe VV u vërejt çartë se nuk ka ndonjë vizion të çartë për vendin, karta nacionale të cilën e kishte përdorur në zgjedhjet e përgjithshme tashme nuk i besohet, pasi që me përformancen e tyre dhe me aksione e qëndrime të dyshimta nuk kanë arritur t’i bindin masat e gjëra. Po të mos ishte rezultati i Prishtinës për Vetëvendosjen do të cilësohej një humbje e thelle e cila edhe kështu është e dukshme në nivelin e përgjithshëm. Arritja në Prishtinë për të mos thënë ekskluzivisht, në masë të madhe duhet t’i dedikohet ish FER-it dhe figurës së Shpend Ahmeti . Prandaj e ardhmja e tyre do të varet nga qëndrimet dhe fuçia të cilën do ta ketë ndikimi i FER-it. Votuesit i bene të çartë Albin Kurtit se ikja nga vija proeuropiane nuk tolerohet nga shqiptaret, dhe duhet t’i shërbej si shembull i mirë jo vetem VV-se por të gjithëve që një paraqitje apo flitë antieuropian nuk do të jetë i suksesshëm.

PF- Prishtina dhe Kosova pati një atraksion në këto zgjedhje, ishte i vetmi subjekt me të cilin u morën edhe mediat e huaja. Edhe përkundër faktit që gjatë gjithë kohës së fushatës u vërejt një përkrahje e madhe për ta, kjo nuk u shndërrua edhe në vota, gjë që konstaton se elektorati kosovar është konservator dhe vazhdon linjën tradicionale dhe ,nuk është ënde i gatshëm të përkrah një iniciativë të këtij lloji.

PSHDK- dua me pak fjalë të trajtoj pak edhe faktorin Demokristian në vend, pasi që ka një bagazh të pakontestueshëm në vend, por që janë vetmet për të ardhur keq në ç’gjendje kanë ra. Udhëheqjet e Demokristianëve duhet të tregojnë minimumit e moralit politik dhe njerëzor dhe të japin dorëheqje të parevokueshme , duke iu mundësuar forcave të reja konsolidimin, për ndryshe më mirë është të mos ekzistojnë fare.

Kosova duhet të shfrytëzoj këtë momentum pozitiv nga këto zgjedhje demokratike dhe t’i prezantoj si vlerë dhe si të arritur në mënyrë që sadopak të shërbejnë në përmirësimin e imazhit të vendit. Ndërsa institucionet të luftojnë me të gjitha mjetet demokratike që të përfitojnë nga situata e krijuar në veri në mënyrë që të minohet ndikimi i Beogradit në Kosovë. Deklaratat e zv. Kryeministrit serb në ditën e djeshme se do ta rregullonte gjendjen për 45 minuta janë një dëshmi e çartë se paraqitja e bandave në demolimin e qendrave zgjedhore ne veri nuk ka qenë befasi për Serbinë dhe se ata kanë nuk e kanë ndërmend të shkëputen nga shantazhimi i shtetësisë së Kosovës.