Shtesë » Lajme

"Plehrat", dhjetra protestojnë: Qeveri anulo importin

E shtune, 20.11.2010, 11:50 AM

20 Nëntor 2010 - 11:10 | Shqiperi

TIRANE-Grupi qytetar u mblodh sot për ti thënë Jo” importit të plehrave sipas nëj vendimi të qeverisë që parashikon që mbetjet të importohen për qëllime përdorimi, riciklimi dhe përpunimi.

Përfaqësues të grupimit qytetar i bënë thirrje sot qeverisë që të kthejë mbrapsht vendimin e miratuar për mbetjet pasi kjo do të sihte shkatërrim sipas tyre për Shqipërinë. “Kjo është rruga më e gabuar, është një veprim i gabueshëm i qeverisë”, tha Ardian Klosi.

“Hej hej qeveri s’duam plehra në Shqipëri”, "Shqiperia nuk eshte kosh plehrash" ishin thirrjet e pjesmarrësve ne proteste.

“Jemi këtu për të dhënë një mesazh shumë të dashur për shqiptarët, që atdheu ynë, Shqipëria të jetë një vend I pastër ndaj ti themi “Jo”, importit të plehrave. Jemi kundra vendimeve të tilla, jemi për të përcaktuar një strategji sit a pastrojmë vendin, sit a bëjmë më të bukur dhe jo të importojmë mbetjet e botës. Ne duhet të kemi një kuadër ligjor dhe një infrastrukturë të plotë për importimin e mbetjeve konform standarteve të BE”, tha Lavdosh Feruni.

Më pas dhjetra pjesmarrës morën fjalën dhe kërkuan që qeveria të reflektojë përpara se të ndërmarë veprime për të cilat do të pendohet për shkak të dëmeve që do ti shkaktojnë ato vendit.

Grupimi i reagimit qytetar nderkohe dhe nje dite me pare i drejtoi nje apel qeverisë dhe pushtetit vendor që të përfshihet në një fushatë kombëtare apo lokale për të pastruar Shqipërinë nga plehrat. Burime nga ministria e Mjedisit kanë bërë me dije se bëhet fjalë për “lëndë të parë” për industrinë ricikluese, që mund të largojë 6000 tonë mbeturina në muaj dhe nuk bëhet fjalë për “import plehrash". Por ky vendim është kritikuar nga shumë shoqata ambientalistësh.

(d.b/BalkanWeb)

20 Nëntor 2010 - 11:48 | Shqiperi

Vendim i qeverise per mbetjet qe lejohen te importohen

TIRANE-
13/10/2010
V E N D I M PËR MIRATIMIN E LISTAVE TE MBETJEVE QË LEJOHEN TË IMPORTOHEN PËR QELLIME PËRDORIMI, RICIKLIMI DHE PËRPUNIMI

miratimin e listave te mbetjeve QË LEJOHEN TË IMPORTOHEN PËR QELLIME PËRDORIMI, RICIKLIMI DHE PËRPUNIMI

Në mbështetje të nenit 100 të Kushtetutës dhe të pikës 4, të nenit 22, të ligjit nr.8934, datë 5.9.2002, “Për mbrojtjen e mjedisit”, të ndryshuar, me propozimin e ministrit të Mjedisit, Pyjeve dhe Administrimit të Ujërave, Këshilli i Ministrave

V E N D O S I:

1. Miratimin e listave të mbetjeve që lejohen të importohen për qëllime përdorimi, riciklimi dhe përpunimi.

2. Importimi lejohet duke u bazuar në kodet dhe titujt e mbetjeve që figurojnë në:

a) Listën e gjelbër, sipas aneksit 1, bashkëlidhur këtij vendimi;

b) Listën B, të aneksit IX, të Konventës së Bazelit, sipas aneksit 2, bashkelidhur këtij vendimi;

c) Katalogun Shqiptar të Mbetjeve (ato pa yll), sipas vendimit nr.99, datë18.2.2005, të Këshillit të Ministrave, “Për miratimin e katalogut shqiptar të mbetjeve”.

3. Mbetjet që do të lejohet të importohen, duhet të jenë të listuara në tri listat e përmendura në pikën 2, të këtij vendimi.

4. Ndalohet importimi i mbetjeve të listave të mësipërme në rastet kur ato përmbajnë mbetje e materiale të rrezikshme, në atë masë që përcaktohen sipas ligjit nr.9537, datë 18.5.2006, “Për administrimin e mbetjeve të rrezikshme”.

5. Listat e mbetjeve, të miratuara me këtë vendim, rishikohen dhe plotësohen në përputhje me thellimin e përafrimit dhe sipas amendimeve të akteve përkatëse të BE-së, nga të cilat ato janë marrë.

6. Mbetjet importohen dhe ruhen të ndara sipas llojit, që tregohet në kodin dhe titullin e tyre.

7. Mbetjet e lejuara për importim, sipas këtij vendimi, ruhen në vende të posaçme dhe në kushte të përshtatshme magazinimi, brenda territorit ku kryhet veprimtaria e miratuar për përdorimin, përpunimin dhe riciklimin e tyre.

8. Importi bëhet sipas rregullave të përcaktuara në vendimin nr.806, datë 4.12.2003, të Këshillit të Ministrave, “Për miratimin e rregullave e procedurave për importimin e mbetjeve me qëllim përdorimi, përpunimi e riciklimi”, duke plotesuar fillimisht formularët e anekseve 3 dhe 4, bashkëlidhur këtij vendimi.

9. Ngarkohen Ministria e Mjedisit, Pyjeve dhe Administrimit të Ujërave dhe Drejtoria e Përgjithshme e Doganave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
SALI BERISHA

(Vota: 0)