Engjëll Koliqi - Poezi të 2 tetoritt 2010 - poesie del 2 ottobre 2010

NË KËTË TRUALL TL SHENJTË

 

Zoti i gjithpushtetshëm

Natyrë të bukur ka krijuar

Me reliev të mrekullueshëm

Mes maleve kreshnike

Edhe oaza të gjalla bereqeti

 

Njerëz të shtrenjtë

Dhe të shenjtë

I ka falë Zoti

Kësaj toke të bekuar të Dardanisë

 

Sa lezetshëm e shohim

Kudo

Në çdo pëllëmbë

Vlon dhe lulëzon

E ëmbëla dashuri

Me plot lumturi

Rritet e kalitet

E bekuara njerëzi

 

Në këtë tokë të shenjtë

Në pëllëmbën që rrezaton

Shkëndijat e para

Të diturisë dhe të trimërisë

Mrekullitë e Zotit

Dhe historia e shenjtë e atdheut

U mësuan në gjuhën amtare

 

Në këtë truall të shenjtë

Gjithmonë i është kënduar

Dashurisë

Dhe lirisë

Është ngritur lartë

Flamuri i shenjtë i njerëzisë

                                Stubëll, 2 tetor 2010

 

ËSHTË DITA JONË

 

O njerëz vullnetmirë

Të gjithë ju

Që vetin e konsideroni pasardhës të ilirëve

Eni se ka arritur

Dita jonë e mrekullive

Dita e fatit

Dita e bekimit

Dita e ringjalljes së shenjtërimit

Iliro-dardan

Eni ta shijojmë dashurinë

Dhe shenjtërinë

Iliro-dardane

-

Gëzuar

                                Ferizaj, 2 tetor 2010

 

BRISHTËSI SHPIRTI

 

Në këto rrethana

Dhe në tërë stinën e dashurisë

Në shpirtin tim ka brishtësi

Fatmirësisht

Anime të theksueshme

Kah ëmbëlsia e dashurisë

Dhe kah bërthama e së vërtetës

-

Gëzuar

Dhe përpara!

                                Ferizaj, 2 tetor 2010

 

KOMBINIM NGJYRASH DASHURIE

 

N’ylberin tonë

Ngjyrat më të bukura dominojnë

Ato të së mirëfilltës dashuri

Vezullojnë

Dhe shpërndahen në të gjitha relievet

Në fillim e në mbarim të stinës

Në të gjithë shekujt

Edhe në amshim

Kombinohen me rregulla njerëzie

Dhe me ligje besnikërie

-

Gëzuar!

                                Ferizaj, 2 tetor 2010

 

KUR MENDOJMË MIRË

 

Kur mendojmë mirë

Në të gjitha stinët i kemi dyert e hapura

Në çdo reliev jemi protagonistë

Dhe bartës të proceseve të dashurisë

 

Kur mendojmë mirë

Jemi të pandalshëm

Në marshiumin e shenjtë të dashurisë

Fuqi të madhe i japim

Kohës dhe historisë

 

Kur mendojmë mirë

Botën dhe kohën i ndryshojmë

Shekullin e dashurisë e amshojmë

Dashurinë nga gjumi e zgjojmë

Besën njerëzore e përjetësojmë

                                Ferizaj, 2 tetor 2010

 

NË PAMËSHIRËSINË E TYRE

 

Tashmë

Mbarë bota po e vëren

Dhe po shihet në të gjitha anët

Shumë të këqija dhe rreziqe

Për mbarë njerëzimin

Zanafillën dhe pikënisjen e kanë aty

Në pamëshirësinë dhe në dreqëritë e tyre

-

Ne nuk dorëzohemi

Qëndrojmë të palëkundshëm

Dhe marshojmë

Me të vërtetat e dashurisë

                                Ferizaj, 2 tetor 2010

 

ME ZËRIN E DASHURISË

 

Fillojmë këngën e parë

Në ditën festive

Vazhdojmë me të dytën

Me të tretën

...

Kalojmë festën

Dhe stinën

                                Ferizaj, 2 tetor 2010

 

PËRRALLA MUZGU

 

Mundohen të na flasin

Edhe për të tyre “mrekulli”

Të shekujve pa histori

T’i dëgjojmë

Dhe t’i injorojmë

Duke plasuar të vërtetat tona

Me të mirëfilltën dashuri!

                                Viti, 2 tetor 2010

 

NE DHE NE

 

Në stinën e dashurisë

Protagonistë kryesorë jemi ne

Në të githa rrugët e mirësisë

Prijmë ne

Në kurorëzimin e dashurisë

Kremten e organizojmë ne

-

Kudo flet historia

Dhe vepron njerëzia

Jemi ne

Dhe ne

!!!

                                Viti, 2 tetor 2010

 

NË PREHËR TË ZEMRËS

 

Ëmbëlsisht shtrihen

Dhe këndshëm përkunden

Të bekuarat përralla të dashurisë

Shndërrohen në realitet

Dhe me mjaltin e dashurisë

Bujshëm

Hyjnë në histori

                                Stubëll, 2 tetor 2010

 

ME FUQI TË SHPRESËS

 

Të gëzuar kalojmë stinët

Dhe jemi të lumtur

Në të gjithë vitet

Dhe nëpër shekuj

Marshojmë

Duke i kënduar dashurisë

Me betim të vulosur në histori

Ia mësyejmë amshimit

...

S’do të ndalemi kurrë!

                                Stubëll, 2 tetor 2010

 

NË KËNGËN E TOKËS SIME

 

Me më të bukurat nota

Dashurisë i rritet zëri

Dhe shtohen vlerat

Deri në qiejt e njerëzisë

Në çdo pëllëmbë të rruzullit

Depërtojnë jehona

Të shenjtërisë së Dardanisë

                                Stubëll, 2 tetor 2010

 

NË ÇDO KËND

 

Gjithnnjë e më thekshëm

Këndon dashuria

E mburret njerëzia

Si perla të historisë

Lulëzojnë lule të lumturisë

Mirëpo

As intereset s’ndalojnë

Në valle absurditeti

Edhe vallëzojnë

Në çdo pikë

Dhe në çdo kënd

Të botës sonë

                                Stubëll, 2 tetor 2010

 

BRENDA SHPIRTIT

 

Kam plot dashuri

Dhe në sytë e të gjithëve

Stina ime

Ëmbëlsisht këndon dhe vallëzon

Histori e re

Me dashurinë e stinës

Dalëngadalë mugullon

                                Stubëll, 2 tetor 2010

 

NË SYTË TANË

 

Diçka po shihet

Dhe po zihet

Me aromë besnikërie

Gjella e dashurisë po vlon

Shihet jetë e këndshme

Që me ëmbëlsi dashurie

I jep shije historisë

-

Rrugën e amshimit merr

Dashuria

                                Stubëll, 2 tetor 2010