Milazim Kadriu: ''Ringjallja, ringjall aktivitetet letrare

Ditë më parë në Podujevë doli në dritë një revistë letrare,botuar nga grupi letrar “Zahiri”.Numri i parë i kësaj reviste letrare në format libri siç thuhet në editorialin e saj erdhi në nj kohë kur ka pak aktivitete letrare nëpër shkollat fillore dhe të mesme të kësaj treve. Kështu kohë më parë disa të rinj  vendosën të formojnë një klub letrar, të cilin e pagëzuan “Zahiri”  që ka një simbolikë. Dhe më pas ata të rinj organizuan  një orë të suksesshme letrare ku treguan  guximin, përkushtimin, dashurinë ndaj letërsisë dhe atdheut.  

Në atë orë letrare lexuan poet llapjanë dhe të viseve të tjera,moshash të ndryshme po edhe  nxënës të shkollave fillore dhe të mesme të komunës së Podujevës.

Duke parë interesimin e krijuesve dhe cilësinë e punimeve që u lexuan, Klubi vendosi të nxjerrë revistën letrare që e pagëzuan “RINGJALLJA”.

Siç thotë bashkërenduesi i klubit letrar Ruzhdi Berisha – Rudi edhe pse pa kurrfarë ndihme institucionale, Klubi  bëri gjithë çka që ishte mundur  dhe jetësoi idenë për ët ringjallur aktivitetet letrare që ekzistonin dikur, të bashkojë krijuesit e brezave të kësaj treve  dhe më gjerë. Ai tha se po bëjmë përpjekje që së bashku të  bëjmë veprimtari letrare të cilat do t’i frymëzojnë brezat që do të vijnë të jenë më të përgjegjshëm ndaj krijuesve të mirëfilltë dhe ndaj vetvetes. Në këtë revistë e cila hapet me poezinë kushtuar dëshmorit të kombit Zahir Pajazitit, të titulluar “Njëqind plagët trimit”(Kambanë  kujtese  për Zahirin) nga Abdullah Zenelei, për të vazhduar me një rrëfim për legjendarin Zahir Pajazitin shkruar nga Kadri Avdiu,më pas për dëshmorin Bedri Ahmeti shkruan Sabit Zeneli. Pastaj me krijime letrare prezantohen Ruzhdi Berisha,Gani Mehmeti, Izet Hjadini, Age Ruçi, Nuhi Potoku, Ramadan Oraca, Syhejl Havolli, Furtunë Sheremeti, Fikrete Abdulalhu, Besnik Jaha, Sadie Ismaili, Zanfinë Zeneli, Pranvera Azemi, Arber Salihu etj.

Botuesi i kësaj reviste Ruzhdi Berisha –Rudi thotë se mbesim me shpresë se në të ardhmen nuk do të mungojë ndihma dhe përkrahja e shoqërisë dhe e institucioneve shtetërore, për të mos mbetur në dorë të fatit. Kjo nuk do të duhet t’i ndodhë RINGJALLJES...