Kulturë
Thani Naqo: Triptik me lirika fshati
E shtune, 13.02.2010, 05:52 PM
Thani NaqoTRIPTIK ME LIRIKA FSHATI...
(shkëputur nga vëllimi me lirika SIMFONITË E STINËVE botuar në vitin 2009)
MËNGJES I FLORIZUAR
Thëllëzkat e n' çuara ia morën këngës,
firon nata nëpër korie,
i përhimti agim shtrin drapërin e hënës,
kosit pllajave dritë-hije
E kaltra qiellore shkrin e venitet,
yjet treten porsi thëngjij,
hëna lëkundet dhe përdridhet,
florizon kashtë dhe kallinj
Florizon çatitë, kalldrëmet e fshatit,
përmes kortinave shkon e vjen,
kur dielli dritëson kokën e shtratit,
dalt' e qerpikëve ëndrra gdhend...
1972
UNË,PERANDORI, I PERANDORISË
SË GJELBËR
Zhytur, i vetmuar, në jeshil livadhi,
aromë lulesh Atdheu e freski ahu,
poleni më pudroi, me spërka nektari,
nën tumba fierishtash mbeta tulatur.
Mbi krye kam qiell krejtësisht të gjelbër,
ndihem perandor i botës me klorofil,
nuk ka hënë, të më shohë vëngër,
me brirët e turpshëm më kqyr një kërmill.
Këtu s' ka presidentë, as kryeministra,
as gjeneralë e buzëqeshje djallëzore,
gushëkuqët vocërakë thurin kanistra,
vargan i milingonave, zënë për dore.
Mburrem, e mburrem, pse mos krenohem?
dirigjoj simfonitë e thëllëzave e bilbilave,
në hotelin e fierishtave të fle e mos zgjohem,
gjersa t' më trokasë e Bukura e Dëshirave!
2007
PËRNDEZJE
Ç'janë përndezur sonte stërnishtat,
lëngëzon rrakita e filiz'i shelgut,
trëndafili i egër më shpoi gishtat,
kolloshtër e hënës mbi gjoks derdhur.
Platitur gu-gu-ja e tufës gjumashe,
trungjet e shelgjeve, si barinj të prapë,
shpalosin gunat në vallen çobançe,
ngjeshin çalikët me kulloshtër e djathë,
Flakërojnë lajthishtat e thanat në korie,
qyqja e vetmuar strukur nën degë,
buzët e përndezura fërgëllima magjie,
mbi gjoksin vajzëror florizojnë dy shegë.
POLEN E NEKTAR
Polen e nektar e aromë livadhi,
polen e nektar mbi pulpat e tua,
pjekur mbi gjoks dy ftonj mali,
ç'ditë e bukur t'i them të dua!
Me hatër për ty, një tjetër zambak,
medalion poleni në varg luleshqerash,
ç'na u ngjitën buzët me pjalm e nektar,
lëng luleshtrydheje e manaferrash!
Ç' dreqin rrëmojnë gishtat mbi ftonj,
mbajmë njëri-tjetrin, oh, jemi dehur!,
nën kërthizën e saj djalëria kërkon,
Moll'e Ndaluar s'ishte bërë për të vjelur!...
NJËHERË E NJË KOHË...
Njëherë e një kohë...Ç' mu kujtuan,
cironkat e thara lëndinave mbi bar,
opingat, peliçja, pantollonat, mballuar,
njëherë e një kohë...Isha fshatar.
Çapkën'i varfër pranë vatrës me prush,
kadet me turshi, bërsitë e athta të rrushit,
mullaja e bakërt ngjitur me brumë,
xhigeri i perlës që piqet mes gushtit.
Njëherë e një kohë...Ja, që mu kujtuan,
vajzat lozonjare, lëndinat me bar,
qeshnim e grindeshim e, aty dashuruam,
pyyy...njëherë e një kohë kur isha fshatar!
2009
Facebook
Twitter
Google+
Digg
Komentoni
Artikuj te tjere
Doli nga shtypi libri më i ri i autorit Gjon Neçaj
Përparim Hysi: Dita e dashurisë
Fazile Buliqi - Januzi : Mbesa ime
Mexhid Yvejsi: Çmimi, refuzimi dhe arsyetimi
Kalosh Çeliku: Imzot Këlysh Melez Llagu shkruaka bukur
Kasam Shaqirvela: Dallgë e dalldisur
Hasan Bregu: Si kritikova në sy të Mehmet Shehut
Eri Rico: Një intervistë që nuk u botua asnjëherë
Arsim Halili: Mjerim mbi supe
Shtëpia Botuese "Rrokullia" ka nxjerrë në shitje librin me titull "Gjuha e këputun e shqipes''
Përparim Hysi: Lara
Ksenofon M. Dilo: Mbresa që nuk mund t'i tretë harresa
Gani Qarri: Përkujtim Babait!
Gjekë Gjonlekaj: Lidhjet e para të Ismail Kadaresë me Amerikën
Këze Kozeta Zylo: Një natë e bardhë
Cikël poetik nga Skënder R. Hoxha
Sami Islami: Londra e kontrasteve
Thani Naqo: Vështrim mbi artin poetik të Alma Papamihalit
Cikël poetik nga Faton Krasniqi
Sabile Keçmezi- Basha: Kodi i pritjes (Cikël poetik)
Gallery
Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora
