Entela Binjaku: Urime ditëlindjen e 15-të gazeta “Ilinden”!

Urime ditëlindjen e 15-të gazeta “Ilinden”!

Nga Entela Binjaku

Në një atmosferë të ngrohtë, miqësore dhe plot përzemërsi, gazeta e pakicës maqedonase në Shqipëri "Ilinden" shënoi 15-vjetorin e botimit të saj. Ceremonia festive u zhvillua në mjediset e Hotelit dhe Restorantit “Dreri”, pranë parkut të liqenit në Tiranë, një vend i qetë dhe i rrethuar nga natyra, që i dha veprimtarisë një atmosferë të veçantë. Veprimtaria, e organizuar në mesditën e së mërkurës së 1 prillit 2026 mblodhi miq, bashkëpunëtorë dhe dashamirës të gazetës, përfaqësues të misionit të OSBE-së në Tiranë,  përfaqësues të shoqatave të pakicave etj. Të pranishëm ishin edhe maqedonas nga Tirana, Elbasani, Korça, Golo Brdo, Prespa, Gora, si dhe të ftuar të tjerë, anëtarë të Shoqatës Maqedonase “Ilinden”. Në fjalën e tij, kryeredaktori Nikolla Gjurgjaj vuri në dukje rrugëtimin e gazetës që nga botimi i numrit të parë e deri më sot, duke theksuar se në duart e lexuesve kanë arritur deri sot gjithsej 71 numra. Numri i parë i gazetës u botua më 1 mars 2011, si një nismë e Shoqatës Maqedonase “Ilinden”-Tiranë. Në këtë përvjetor mori pjesë dhe përshëndeti  znj. Radmila Stojmirovska, E Ngarkuara me Punë e Republikës së Maqedonisë të Veriut në Tiranë. Në fjalën e saj  zonja Stojmirovska, theksoi rëndësinë e këtij botimi, i cili për më shumë se një dekadë e gjysmë ka qenë një shtyllë e vërtetë e komunitetit maqedonas në Shqipëri dhe një vend ku çdo anëtar mund të gjejë lajmet, informacionet dhe zhvillimet më të fundit nga atdheu ynë, nga Shqipëria dhe nga jeta e përditshme e komunitetit maqedonas.

Duke shprehur urimet e sinqerta dhe përgëzimet për suksese të mëtejshme zonja Stojmirovska tha se: "Është e rëndësishme të theksohet se botimi i gazetës bëhet i mundur edhe falë mbështetjes së Ministrisë së Punëve të Jashtme dhe Tregtisë së Jashtme, e cila ofron ndihmë financiare në formën e fondeve të projektit për botimin e saj të rregullt".  Në fjalën e tij, kryeredaktori Gjurgjaj theksoi se gazeta “Ilinden”, në 15-vjetorin e saj, mbetet një dëshmi e përkushtimit dhe punës së vazhdueshme, ndërsa rëndësia e saj do të vlerësohet edhe më shumë nga historia. Ai ju drejtua me falënderime lexuesve besnikë, të cilët me interesin dhe mbështetjen e tyre kanë dëshmuar rëndësinë e kësaj gazete për komunitetin. Më tej fjalën e morën zoti Vasil Sterjovski, kryetar i “Aleancës së Maqedonasve për Integrim Europian”, zoti Nikolla Angelovski, nënkryetar i Shoqatës “VARDAR-MKD” nga Podgorica, Mali i Zi. Në këtë ditë festive gazeta nderoi me certifikatë mirënjohjeje zonjën Marjana Doda, kryeredaktore e portalit "argumentum.al".

Ndër të pranishmit ishin gjithashtu z. Atanas Ploça, nënkryetar i Bashkisë së Pustecit, Vasil Sterjovski, kryetar i “Aleancës së Maqedonasve për Integrim Europian”, Verica Mukoska, lektore e gjuhës maqedonase në Fakultetin e Gjuhëve të Huaja të Universitetit të Tiranës, si dhe avokati Nikolla Angelovski, nënkryetar i Shoqatës “VARDAR-MKD” nga Podgorica, Mali i Zi. Botimet e gazetës “Ilinden” ruhen në institucione të rëndësishme, si Biblioteka Kombëtare në Tiranë, Biblioteka e Kuvendit të Shqipërisë, Biblioteka Kombëtare dhe Universitare “Shën Kliment Ohridski” në Shkup, si dhe në institucione të tjera kulturore dhe shkencore. Misioni i gazetës ka qenë dhe mbetet ruajtja dhe promovimi i gjuhës, kulturës dhe identitetit maqedonas në Shqipëri. Gjatë viteve, ajo ka dhënë një kontribut të rëndësishëm në trajtimin e çështjeve me interes për këtë komunitet dhe në forcimin e identitetit të tij etnik, gjuhësor dhe kulturor. Nga marsi i vitit 2017, përveç versionit të shtypur, gazeta  është e aksesueshme edhe online në faqen e saj zyrtare duke u bërë e arritshme për publikun e gjerë, si dhe për maqedonasit në Shqipëri, rajon dhe diasporë. Sot gazeta është standardizuar sipas normave ndërkombëtare për botimet periodike, duke u pajisur me ISSN, dhe përmbajtja e saj shpërndahet edhe në platforma të njohura informative në vendin fqinj. Pakica kombëtare maqedonase në Shqipëri  është e përqendruar në shumë fshatra përgjatë kufirit shqiptaro-maqedonas në zonën e Prespës në Bashkinë e Pustecit, në fshatin Vërnik në Bashkinë e Devollit, në zonën e Gollobordës, në Bashkitë e Librazhdit dhe Bulqizës, në fshatrat Herbel dhe Kërçisht i Epërm dhe i Poshtëm në Bashkinë e Peshkopisë si dhe në zonën e Gorës në Bashkinë e Kukësit.