Spica Metalike: Tradhtia ka emër

Spica Metalike

Satirike

Tradhtia ka emër

Tradhtia më e rëndë është ajo politike,

me dinakëri e buzëqeshje plastike.

Kur del në ekran, politikani në kolltuk,

premton “rrugë, shkolla, ujë me bollëk”.

Thotë: “Do ta luftoj hajninë e pushtetit!”

E sot ka katër vila, në çdo anë të qytetit!

Kur e pyetën për popullin, tha me hoka:

“Ata janë mirë, të zënë me TikTok-a!”

Pas zgjedhjeve - veç taksa e mashtrime,

shkoi gati një sezon vetëm me votime.

Kështu qytetari i gjorë, vonë merr vesh,

se vota e tij, me nder, shkoi për lesh.

Tradhtia me radhë vjen nga shoqëria,

aty ku buron e keqja, e gjithë ligësia.

Ajo të tradhton edhe në ditë me shi,

kur ke nevojë për “besë” e “dashuri”!

Kështu mësova unë në rrugën e jetës,

kur Rusoi tha për hir të së vërtetës:

“Njeriu lind i lirë, i mirë e me vlerë,

por shoqëria e prish, e bën të mjerë.”

E ç’janë besa, fjala, nderi dhe morali?

Janë fjalë muzeu - si diçka prej ideali.

Sot shitet ndërgjegjja në paketim familjar,

dhe tradhtari quhet... “një njeri vizionar”!

Tradhtia është moderne, “trendi i ri”,

nga kreu i shtetit, deri te hallexhiu i zi!

Të gjithë me maska, fjalët - ëmbëlsirë,

po ua ktheve shpinën - bëhen egërsirë!

(Karikatura marrë nga interneti)