Ndue Ukaj: Tymnaja primitive politike

Ndue Ukaj:

Janë do shqiptarë që manifestojnë ndjesi sensuale kur flasin për politikë e politikanë dhe si nxënës të këqij të historisë, nuk i dëgjojnë këshillat e të mençurve që thonë, “mos bini në dashuri me politikanët.”

Faik Konica, përpara një shekulli i këshillonte shqiptarët të shëroheshin nga dashuria për individin, sepse, vetëm kështu e ndihmonin Shqipërinë dhe i kontribuonin asaj.

Pas një shekulli, mendimet e Konicës, tingëllojnë krejt aktuale, si të ishin shkruar sot, në këtë tymnajën tonë primitive politike, ku turmat e madhërojnë një person dhe bien të këmbët e tij, si para një të shenjti

Mjerisht, shumica prej atyre që me afsh shkruajnë e komentojnë, duket se i shohin shkronjat, ama nuk kuptojnë asgjë për çka flasin e çka komentojnë. Kjo vlen sidomos për ata që me tejqyra e shikojnë Kosovën prej vendeve tjera dhe turfullojnë plot vnerë.

Ky zjarri patriotik, që u ndez për interesa elektorale, nuk ka lidhje me patriotizmin dhe nuk i shërben vendit tonë. Është zjarr ku mund të digjen idealet tona, pas të cilit mbetet vetëm shkrumi e mjerimi.