Mehmet Kraja: Sfidat e bashkëpunimit ekomomik Kosovë-Shqipëri

Fjalë e mbajtur në konferecën për sfidat e bashkëpunimit ekomomik Kosovë-Shqipëri

Nga Mehmet Kraja

Të nderuar miq, akademikë, pjesëmarrës të konferencës shkencore për bashkëpunimin ekonomik Kosovë-Shqipëri.

Më lejoni të them që në fillim se unë i takoj atij rrethi njerëzish, atij brezi, të cilët integrimet e ndërvetshme, përfshirë edhe bashkëpunimin ekonomik, si një komponentë themelore e këtij integrimi, i konsideroj me prioritet kundrejt të gjitha integrimeve të tjera, madje si pararendje në integrimin e rrëmujshëm europian.

I takoj, gjithashtu, atij rrethi njerëzish, atij brezi, të cilët kanë besuar se një situatë ideale siç kjo, kur Kosova dhe Shqipëria janë dy shtete më vete, integrimi i ndërvetshëm nuk është vetëm idealitet, është imanencë, është domosdoshmëri.

Pse nuk po ndodhë kjo? Pse kemi ende ngecje në bashkëpunimin politik, ekonomik dhe kulturor Kosovë-Shqipëri?

Duhet t’i heqim disa tabu dhe të flasim hapur, sepse kemi nevojë që nga kjo foltore t’i quajmë me emrin e vërtetë disa faktorë, disa zhvillime që e pengojnë këtë integrim.

Pra, duhet ta themi qartë se është politika ajo që bën pengesa, që iu fut shkopinj nën rrotë integrimeve shqiptare. Në këtë pikë mendoj se do të pajtoheni të gjithë se Shqipëria do të duhej të ishte promotori i këtyre integrimeve dhe i këtij bashkëpunimi. Por, është duke ndodhur e kundërta: Shqipëria ndonjëherë me shumë agresivitet, i jep vetes rol paternalist, ndonjëherë duke cenuar interesat vitale të Kosovës dhe herë të tjera duke margjinalizuar fuqinë vendimmarrëse të faktorit shqiptar në Maqedoninë e Veriut.

E them këtë vetëm për të bërë me dije, duke menduar se ju, ekspert të ekonomisë, do ta thoni qartë se nismat si “Ballkani i hapur”, pavarësisht sa kanë qenë nisma ekonomike, ose politike-ekonomike, ato kanë qenë thellësisht politike dhe kanë dëmtuar substancialisht marrëdhëniet Kosovë-Shqipëri. Të besosh se Shqipëria mund të flasë sot në emër të Kosovës, duke mos marrë parasysh interesat e saj; njësoj sikundër që të besosh se marrëdhëniet e Shqipërisë me disa fqinjë ballkanikë dëmtohen për shkak të Kosovës, është naivitet politik. Është po ashtu naivitet politik të besosh se marrëdhëniet Tiranë-Beograd mund të zhvillohen në harmoni të përsosur, jo më duke anashkaluar Kosovën, por duke prekur në substancë interesat e saj. “Ballkani i hapur” i ndihmoi Serbisë ta anashkalonte dhe ta margjinalizonte Kosovën në të gjitha marrëdhëniet rajonale.

Po ashtu mendoj se duhet thënë me qartësi se në bashkëpunimin ekonomik Kosovë-Shqipëri janë krijuar disa parakushte të mira, siç është komunikimi dhe qarkullimi i papenguar i mallrave, i njerëzve dhe i kapitalit, por duhet evituar të gjitha pengesat e paarsyeshme.

Këto janë çështje që besoj se do të trajtohen gjerësisht në këtë konferencë.

https://www.facebook.com/mehmet.kraja