Fritz Radovani: Presidenti i parë shqiptar... në internet

PRESIDENTI  I  PARË  SHQIPTAR … NË  INTERNET:  “v.v.v.ik!”

Në 100 vjetorin e Pavarsisë…

Nga Fritz RADOVANI

Plot 90 vjet përpara kryeministri i qeverisë shqiptare Ahmet Zogu, në vitin 1922, ishte edhe minister i mbrendshem…fluturoi nga “çerdhja” e u ba president…e, edhe mbret!

Në gjurmët e tij deri në vitin 1946, në qeverinë terroriste të Tiranës komuniste, Haxhi Lleshi, një nga personalitetet e nalta edhe ky, ishte minister i mbrendshem që bahet president.

Si duket, diktatorët, mbasi njohin zyren e ministrit të mbrendshem, tue mos u knaqë vetem me ndjekje njerzish nga mbrapa, me arrestime, rrahje, dëbime apo helmime e shpartallime të jetës së shqiptarëve, kerkojnë me shkue “aty”, në atë kolltuk ku “njerezit e drejtësisë”, që janë rreth tij, me veprue ashtu si thotë “presidenti”,...që njihet si figura ma e randësishme e shtetit.

Presidenti në sistemet totalitare komuniste në dukje asht figurë pa pikë vleret. Ai zbaton vendimet e “gjykatave të nalta”, që i percillen me “shenimin” e “sekretarit të parë të K.Q. të partisë”, gojore apo telefonike, mbasi mes presidentit dhe atij nuk ka kurrë “mosmarrveshje”...

Sidokjoftë, “firma” e tij të çon në konop, në plumb, ose edhe gjithë jeten kampesh...

Nenshkrimet e tij të gozhdojnë në ballë etiketen e pashlyeshme të “luftës së kllasave”, që nuk mundet askush me e zhgulë as në sistemet mbasardhëse “demokratike”; fakt asht Shqipnia e sotme, që vazhdon mos me afrue asnjë të persekutuem në poste të nalta, perveç “atyne” që tash ma se 20 vjet janë të garantuem nga ministria e mbrendshme, që vazhdon me nxjerrë Presidenta.

Dihet vetem presidenti i parë i Shqipnisë komuniste, që asht zhdukë nga Enver Hoxha, u shoqnue me dokumentin sekret të “vetvrasjes”, sigurisht, si njeri që ishte pranë tij dhe me té ka krye çdo veper terroriste, po edhe kanë projektue bashkë per të ardhmen e “ndritun”...

Nga viti 1946, mbas vrasjes presidentit Omer Nishani, në maji 1954, edhe pse ishte bashkqytetar i Hoxhës, nga Gjinokastra, dhe deri në vitin 1981, kur prap u “vetvra” kryeministri Mehmet Shehu, terroristi nr. 2, edhe ky ish minister i mbrendshem (1948 – 54), ministrat tjerë të asaj ministri, nga Koçi Xoxe, Kadri Hazbiu etj...fatmirsisht shumica u pushkatuen, mbasi sot do t’i kishim të gjithë në krye të vendit. Nder presidentët i vetmi asht anadollaku Ramiz Alia që mbajti dy postet ma të randsishme njëheri, dhe até të sekretarit të parë të PPSh, mbasi i dukej se po vdes pa vra njeri kur nuk firmonte vetë nder letra ekzekutimet... e aq ishte i etshem per krime, sa të Ndjerin Havzi Nela, nuk u knaq me e pushkatue...po e vari!

Dosja 13532/A…Havzi Nela: Në faqen 2: "Per çeshtjen penale 60", gjyqtari Agim Hoxha shkruan dy ditë para gjykimit se "duke parë çeshtjen në kompleks, interesin e partisë në rreth si dhe perhapjen e veprimtarisë armiqësore në rrethin e Kukesit, duhet të jepet denim kapital. Që t'i shërbehet më mirë parandalimit të veprimtarisë armiqësore në rreth, duhet t'i jepet si mënyrë ekzekutimi: vendimi me vdekje e varje, ku mund të ekspozohet i dënuari.” Nderkohë të njejtin vendim kishte dhanë edhe gjykata e shkallës së naltë që dretohej nga Fehmi Abdiu...

Me 10 gusht 2012 po mbushen 24 vjet që asht varë poeti e mësuesi disident Havzi Nela… Po presidenti që e vari, po gjykatësit e Tij…Po ministrat e mbrendshem, hetuesit ku janë sot?...

Më falni se harrova…Mblidhen rreth tavolinës, ku kryet e vendit e zenë “presidenti” që shpjegon…: ”Edhe Zogu ishte qenë president para 90 vitesh… në internet lexova porosinë e tij per presidentët tanë…mund t’a gjeni “v.v.v.ik”, që domethënë: “Vra, varë, vidh… ik!”…