Janaq Pani: Historia e një bubi dhe një maçoku

Janaq Pani, Toronto

HISTORIA E NJË BUBI DHE NJË MAÇOKU - Fabul

Shoh një bubi leshator

te maçoku i komshisë

po afrohet paqësor

t'i zgjat' dorën e miqësisë.

Pa i flet me zemrën peshë:

"Kthetrat përse i ke nxjerrë,

syrin me mëri ke veshë,

gati je për të më çjerrë

çastin pret veç për t'u ndeshë?

Si mik unë të kam ardhë,

ndaj qetësohu, o derëbardhë!"

Po maçoku iu gërmush:

"Në guxove të afrohesh

të paralajmëroj, qenush

në çast ti do të pendohesh."

Ia kthen bubi zë miklues

tek tund bishtin ledhatues:

"Kemi javë e kemi muaj

që po grindemi pa shkak

e po shihemi si të huaj,

ndaj maçok, pa ndalu pak!

Çdo fitojmë unë  e ti

në se ndeshemi mes nesh?

Unë do mbetem pa një sy

e ty ndoshta pa një vesh.

Unë them, se do t'ia vlejë

që ta shmangim kët' betejë..."

Dhe maçoku thellë-thellë

këtë çast ndoshta ka pritur,

sot qenushi i ka sjellë

paqen në shpirt për t'ia mbjellë

qimet lart për mos ia ngritur.

E ky bubi nuk flet koti

dhe pse është m ë i forti.

Kur e mira nis nxjerr krye

rrit lastarë miqësie...

Qysh aherë bub' e maçoku

eh, sa mirë fjalën e gjetën,

lozin, qeshin tok së toku

dhe në paqë e shkojnë jetën.