Dy poezi nga Ejup Ceraja

Ejup CERAJA

GJAK E GJUHË TË NJËJTË I KEMI

(Në 133-vjetorin e LSH të Prizrenit)

-Në frymën popullore-

Për t'i mbrojtur trojet tona

Që i trashëguam denbabadent,

U tubuan krerët shqiptarë

Në Lidhjen e Parë të Prizrenit.

Ishte ulur pranë oxhaku

Si në odat e Malësisë -

I urti, i mençuri Ymer Plaku

Që e hapi Mbledhjen e Parisë.

- Në këtë Kuvend, tha, jemi tubuar

E tërë ajka e Sh q i p ë r i s ë -

Ta dëgjojmë se çka për të shtuar

Abdyl Frashëri prej Toskërisë.

Abdyl Frashëri u ngrit në këmbë

Me atë tonin e vet të burrërisë,

Për të mirën e A t dh e u t

Kështu i foli atë ditë Parisë:

- Gjak e gjuhë të njëjtë i kemi

Që nga Iliria e gjer më sot,

Gegë e Toskë vëllezër ne jemi

Atdheut tonë duhet t'i dalim zot.

- S'e pranojmë Traktatin e Shën Stefanit

Kush është trim e kush është burrë -

Ta tregojë vetën në log të mejdanit

Për A t dh e, o sot - o kurrë!…

Kështu u foli Abdyl Frashëri

Që mendimin dysh s'e bani

- Për ca çështje ushtarake

Do të na flasë, tha, Sylejmani

Sylejman Vokshi pika e burrit

Me madhështinë e kryetrimit,

U betua në Himn të Flamurit

Duke iu drejtuar atë ditë tubimit.

- Në të gjitha krahinat shqiptare

Do ta ngremë një ushtri të re,

Si në kohën e Mesme të Arbrit

Në kohën e të Madhit, Skënderbe.

- Kështu zot do t'i dalim Atdheut

Do ta mbrojmë atë metër për  metër,

Jemi stërnipërit e Skënderbeut

Liri duam e asgjë tjetër!…

- Që nga sot e jetë pas jete

Ditë për ditë e mot për mot,

Shqipërinë do ta bëjmë më vete

Bijtë e saj do t'i dalin Zot…

(10 qershor 2001)

JEMI SI LISI ME DY DEGË

(Poezi për fëmijë)

Jemi si lisi

Me dy degë

Jugu Toskë

Veriu Gegë.

Atje shtëpia

Këtu oxhaku

Jemi vëllezër

Gjuhe e gjaku.

Njëri-tjetrit

Ia japim krahun

Në një vend

Zemrat na rrahun.

Kur në ato anë

Ëmbël këndohet

Këndej jeta

Mirë shijohet.

Kur andej

Pranvera del

Mjaltë në hoje

Këndej rrjedh.

Myzeqeja

Përbri detit

Është hambar

I bereqetit.

Me fushë Kosovën

Në këtë anë

Janë dy motra

Me një NËNË.

Jugu Toskë

Veriu Gegë

Dy qershia

Në një degë.

Rrahin zemrat

Tak, tak, tak

Nga Ksamili

Deri në Llap.

Në mes Malësia

Në mes Drenica

Në mes Korabi

Dhe Qyqavica.

Këndej Dukagjini

Andej Vlora-Shkodra

Janë sikur vëllai

Që i ka dy motra.

Fëmijët lirshëm

E thithin frymën

Nga zemra dielli i lirisë

Ua ka larguar brymën.

U qeshin zemrat

Të gjëra det

Rritën fëmijët

Plot shëndet.

(2000)