Dy poezi nga Janaq Pani

Janaq Pani

RRUGËN NIS MBI MALE E DETE

Kam një grua, një lanete

rrugët nis mbi male e dete

kapërxen kufij e shtete

në kurbete larg na vete.

Ajo rrugën nis prej hallit

digjet shpirti i të gjallit

krahë bën ai prej hallit

se atje ka sytë e ballit.

Atje zemra, atje syri

atje vajza, atje biri

nipat - gurë xhevairi

mbesat si kalem floriri.

Këtu mbet i shkretë pragu

mal këtu rritet meraku

këtu ujë të bëhet gjaku

brengat - s'ka të sosur vargu.

Këtu dhëmbjet, këtu derti

këtu loti që plumb treti

shpirti akull këtu mbeti

shpresa - syrin nga kurbeti...

TË LUTEM EJA GJYSH

Të lutem nisu e eja gjysh

e pranë të dua ti moj nënë,

këtu ku jam lloj-lloj CD-ish

përditë po më vënë.

Ninullat këtu nuk dëgjohen

ndaj eni e më këndoni,

se s'dua që të fle e zgjohem

me këngë magnetofoni.

E ku ka shpirt magnetofoni,

s'ka zemër që t'i dhëmbë,

prandaj të vini, më premtoni

i miri gjysh, e mira nënë.