Shtesë » Lajme
Personat me aftësi të kufizuar lëvdojnë PTK-në
E enjte, 03.03.2011, 09:51 PM
Prishtinë, 1 mars - Posta dhe Telekomi i Kosovës është i vetmi institucion publik që ka punësuar persona me aftësi të kufizuara. Për këtë arsye, Shoqata e Personave të Hendikepuar dhe me aftësi të kufizuara e Kosovës, ka nderuar me një mirënjohje drejtorin ekzekutiv të PTK-së, Shyqeri Haxha.
Agim Vatovci, kryetar i shoqatës dhe i punësuar në PTK, ka vlerësuar lart kontributin e kompanisë për këtë kategori të personave, ndërsa ka thënë se nuk po gjejnë trajtim të barabartë në kompanitë tjera. Sipas Vatovcit, kompanitë e tjera më të mëdha se PTK, injorojnë aplikacionet për punësim të personave nga kjo kategori. Haxha ndërkaq ka falënderuar shoqatën dhe ka shtuar se do të vazhdojë të japë kontributin e tij në këtë drejtim. Haxha shtoi se do të vazhdojnë me përmirësimin e infrastrukturës së nevojshme për të lëvizur më lirshëm personat e kësaj kategorie.
Deri më tani, Posta dhe Telekomi i Kosovës, ka punësuar rreth 30 persona me aftësi të kufizuara.