Kastriot Dervishi: Epopeja me djegie shtëpish të shqiptarëve

“Natën e caktuar kapërcyem Shkumbinin dhe xhadenë të ndarë në dy kolona. Kolona e parë: 3 batalione të Brigadës së 4-rt, bashkë me shtabin e vet, kaluan nga Qafa e Thanës për në Qarrishtë. Kolona e dytë, një batalion i Brigadës së 4-rt dhe dy batalione të Brigadës së 1-rë kapërcyen Shkumbinin dhe u hodhën në Hotolisht. Kjo kolonë ka operuar në Hotolisht, Dragostundë dhe prej Hotolishti deri në Qarrishtë...Kemi djegur shtëpinë e Daut Gunës në Dragostun, si dhe shtëpitë e kushëririt të tij. Konfiskime nuk bëmë pasi ata i kishin marrë masat. Kolona e parë u godit me reaksionarët e Qarrishtës. Të dy kolonat u poqën në Qarrishtë. Me përjashtim të shtëpisë së Bilal Biçakut e të një shtëpie tjetër kishin ikur, duke mos lënë asnjë send në shtëpi. I bëmë thirrje popullsisë të kthehej në shtëpi, por nuk erdhi, përkundrazi, na goditi nga pylli e shkëmbinjtë e lartë. Atëherë kundër këtij fshati morëm masa të rrepta, dogjëm 10 shtëpi reaksionarësh koshientë. Në këto luftime patëm 1 të vrarë e 5 të plagosur”.

(Pjesë nga letra e datës 30 qershor 1944 e komisarit të Divizionit të 1-rë)