Kastriot Dervishi: “Janë popull i keq dhe shovinistë”

Forcat komuniste nga Shqipëria, në vijim të operacioneve për nënshtrimin e popullsisë civile në Kosovë, në funksion e shërbim të vendosjes së pushtet serb atje, sulmuan disa fshatra të Drenicës, forcat e komanduara nga Mehmet Gradica. Një pjesë e popullit ishte larguar. Në përfundim të luftimeve, me forca e mjete të pabarabarta, komunistët shënonin se kishin marrë në fshat: 10 palë brekë, 4 xhaketa, 10 batanije, 11 këmisha, 4 palë këpucë, etj. Midis të tjera, në njoftim thuhej:

“Nga sulmi i rrufeshëm i partizanëve u detyruan të tërhiqen dhe të zënë vend në Bivolak, Strovc dhe Beçuk. Në pozicione mbrojtëse të mira mundën të rezistojnë deri në darkë dhe duke përfituar nga errësira e natës ikën të shpartalluar nëpër drejtime të ndryshme. Të nesërmen e kësaj datë, forcat tona hynë në katundet e mësipërme pa gjetur asnjë rezistencë...

Shtojmë se populli i katundit Strovc, Bivolak dhe Zhillovë, ku operoi batalioni ynë, jo vetëm që nuk ishte i gjithë, por edhe një pjesë e vogël fare që ishte prezentë, politikisht qëndroi shumë keq, antifrontit dhe shovinist në kulm”.

(Pjesë nga njoftimi i datës 4 dhjetor 1944 i komandës Batalionit të 1-rë të Brigadës së 5-të, nga “Kosova e lirë” për luftimet në Prelluzhë)