Ndue Ukaj: Zgjohet si perëndimor, bën ditë si oriental dhe bie në gjumë në ëndrra marksiste

Ndue Ukaj:

Që Kosova e sotme ka raporte të mira me Turqinë, nuk ka kurrfarë dyshimi dhe ky lajm përbën zhvillim pozitiv, por të thuash se marrëdhëniet e Kosovës me Turqinë janë të thella, historike dhe kulturore, kjo domethënë të pohosh një të pavërtetë të madhe, qartësisht të thuash një rrenë të frikshme dhe tregosh se je krejt i cekët në çështje të historisë e të kulturës. Sepse, jo për fajin tonë, raportet tona historike e kulturore me Turqinë, janë negative dhe historia e identitetit tonë, prej periudhës së Gjergj Kastrioti e mbasandej, pra, që kur kanë zbarkuar turqit këndej, është formuar në kundërshtim të ashpër me Turqinë, për arsye krejt të thjeshta: shqiptarët nën këtë sundim të egër, ishin të privuar nga çdo e drejtë, të vrarë e të dhunuar, të shtypur e të shkatërruar, pa shkolla dhe të lënë në prapambeturi të madhe.

Rilindja Kombëtare, të cilës i shërbeu edhe Samiu, Naimi e Abdylli, kishte ide e ideale krejt tjera nga ç’kishte Turqia, pra ishte oponencë e fortë e krejt këtyre gulçimeve kryeministrore.

Atëherë, ku i gjejnë këto marrëdhënie të thella, historike e kulturore, këta mendjeshkretit e sotëm?

Në histori e evidenca historike, jo.

Në kulturë e evidenca kulturore, jo.

Prandaj, një pretendim i tillë kur e nxjerr krye nga fuqia politike, është i dëmshëm, sepse nuk ka lidhje me të vërteta historike e as kulturore, por mund të jetë në funksion epsheve të linjës së fortë osmane, që kurrë nuk janë pajtuar me pavarësinë tonë kombëtare të 1912, as me flamurin me shqiponjë dhe gjithmonë e kane kërkuar babën.

E kjo linjë e ka thellë në zemër pushtimin osman.

Duhet ta përsërisim atë që e kanë pohuar po thuajse të gjithë patirotët e mendimtarët shqiptarë, se pushtimi osman është aksidentit më i rëndë historik i shqiptarëve dhe, siç thotë Konica, aty duhet kërkuar shkaqet e prapambeturisë sonë.

Prandaj, pohimet e kryeministrit shpërfaqin injorancë të thellë- po t’i dëgjonte Samiu gulçet e tilla, do të tmerrohej.

Sepse, Samiu ishte krejt e kundërta e këtij pohimi, për çka madje edhe u dënua.

Fjalimet e tilla patetike shpërfaqin krizën e thellë identitare të udhëheqësit, që zgjohet si perëndimor, bën ditë si oriental dhe bie në gjumë në ëndrra marksiste.

Kosova është duke e paguar shtrenjtë faturën e një mendësie të tillë.