E diele, 25.02.2024, 07:17 PM (GMT)

Kulturë

Blerim Rrecaj: Kryekrizë

E diele, 05.06.2022, 09:52 AM


Blerim Rrecaj

DIELLI, KY BARI RESH

Zgjohem

Në mëngjes

Nga dritarja

Shoh

Diellin

Këtë bari

Resh

PEZULL

S’po kam çfarë të bëj

Po i tjerr retë e qiellit

Si leshin e deleve

Dhe nuk po thur asgjë

NË MES

Zë vend

Ulem

Kërkoj

Një lëng vendor

100% prej frutave

E rri në mes

Orës

Ditëtreguesit

Pa udhërrëfyes

Dhe globit

Të shqetësuar

KRYEKRIZË

M’u ankua një i afërm

Një mik

Një vëlla

E edhe dikush tjetër

Se në shumë lokale

Kafetë s’janë të mira si përpara

Është krizë

Edhe çajrat e pijet

I kanë shtenjtuar e ndërruar

Nuk ia vlenë më aq shpesh

Nëpër to të hyjmë

Botë hallemalle

Problemegrumbulluar

Plagëshumë

Vargvrragë

Si te ne dikur

A më pas

Në Siri

Në Afghanistan

E në Ukrainë

Tash

ME NJË MOLLËKUQE

Erë e jetës

Më kapi për krahësh

E për flokësh

Më përplasi tutje

Nga dritaret e veturës

Më hodhi në këtë livadh me

“Tri gota”

Të Latif Berishës

Ku ulem

Po rri

Pak lulekamomili pranë

Përreth kodra e vendbanime

Nga një fije bari

Fluturon një mollëkuqe

Që ëndërron krahët e fluturës

E marr për pak çaste

E vë në pëllëmbë dore

Për të më bërë shoqëri

KTHIM KUTURU

Nuk munda të gjeja fjalë

U nisa veç me vetminë time të përçudme

Nuk munda të gjeja dhuratë

Që do të mund të befasonte për kohë të gjatë

U nisa me papërcaktimet e mia

Prej ndejnaku e endacaku

Nuk munda të gjeja asnjë lule a frut

Që do ëmbëlsonin lumturinë

Erdha dhembjefshehur e plagëpaparë

Kështu kuturu përfytyrova

Një kthim kuturu

Një rikthim kuturu

FESTË

Mbylla sytë

Ëndërrova

Këndova

Vallëzova

Pasi që

Mirësi

Ndolla

E mbolla

MBRETIN PESHKATAR

Zogmbretin peshkatar

Përpos se në dokumentarët e Arian Mavriqit

E pashë për herë të parë edhe me sy

Në Liqenin e Mjellmave

Në një fshat pitotesk

Në natyrë

Rrufe më iku mbi kokë

Pas ca gëmushash

E shpejt më humbi sysh

E m'u shfaq në fotografi

Sapo e hapa një çokolatë për fëmijë

PESHKU I ARTË

Ditë e ngrohtë

Jo aq e ngrohtë për t’u larë

Fëmijët s’duan t’ia dijnë

Hyjnë në liqenin e Badocit

Në këtë mesmaj

Dhe dalin me një peshk të artë

KANDIL DETI NË QIELL

Mbrëmje

Para muzgut

Shikoj dallëndyshet

Që edhe sivjet

Vazhdojnë fluturimin

Në copën e qiellit

Mbi ballkonin tim

Pak më tej shfaqet

Një kandil deti

Që rri pa lëvizur

Në një vend

Pak më tej

Përpara

Se të shkrihet

Sikurse të mos ish

FLUTURAT E QETA TË MUZGUT

Dola andej kah arat e livadhet

Aromë herbariumesh

Frymëmarrjes i jep jetë

Flutura të qeta pushojnë

Nëpër fije bari

Shtrirë si nëpër shezlonge

E shijojnë këtë mbrëmje të qetë



(Vota: 0)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora