Qazim Shehu: Për shenja më të arrira

QAZIM D. SHEHU

 

PËR SHENJA MË TË ARRIRA

 

Zogu i zemrës në kafaz të kraharorit

Njeh vetëm alfabetin e morsit,

Kërkon ca vise të përndritura

Ku shenja të fshehta jep.

Dhe nuk e di kush mbetet e papritura

Kur zemra nga ngopja të heshtë.

Në çastin kur të ndodhë kjo,

Kur zemra të heshtë nga lumturia,

Unë do të lë dhe do të shkoj

Për shenja më të arrira…

 

 

EMRI JOT…

 

Si një shtresë vese e jodizuar

U hodh emri jot në pelerinën e muzgut,

Rreze që s`mundi me u shkruar,

Dhe u përvodh

Në fund të zemrës sime  për t`u strehuar.

Ish si një perlë që ra në fund të pusit

Aty ku uji kish shteruar…

 

 

THELB…

 

Pa dashurinë e nënës, bota do ishte  më e vogël,

Dhe pa dashuritë e tjera nuk do ishte kaq e madhe.

Gogla e fatit bredh pa pritur gongun e shogët,

Si mornicat e punës në fushën e një shuplake.

Cila të çon tek thelbi më i sigurtë,

Gatuar me prush dhe njomjen e ujtë,

Dashuria për nënën na bën më të urtë

Përfytyresën për të

Pa ia dorëzuar askujt…

 

 

INXHI…

 

Argjend i puthjes së panisur

Në pushin e mbrëmjes u shkri,

Buza prej ethes është dirsur,

Dirsja ndrit si inxhi.

Në publikun që kalon ,

Haptas puthen të rinjtë,

Puthja nga morali veten çliron

Por nxihen inxhitë…

 

 

GISHTA

 

Gishtat e flladit sumbullën

Ia shpleksën bluzës verore

Si dy gjarpërinj gjinjtë hurbnin

Një nojmë gjarpërore.

Si dy gjarpërinj kërleshur

Në vallëzim mitik,

Gishtat këputeshin,nxeheshin

Nga zjarrin që arsyen fik…

 

 

POETËVE

 

Para se të lexosh fëshfëritjen e një mëndafshi

Në minifundin e një lozonjarje,

Para se të lexosh  rrjedhën përmes barit

Midis dy kodrave bujare,

Dhe para se të lexosh mbrëmjen që bie,

Si një parashutë nga katastrofa e qiejve,

Para se të lexosh guximin për të dalë

Nga kurthi i frikacakëve në hije,

të tjera që tani s`më vijnë në mend,

Poetët ankohen se vargjet nuk ua lexojnë….

 

 

UNIFORMITET

 

Dëbora fshin hapësirat,

Kufijve u jep bardhësi,

Me gjuhëza të ftohta

I shpalos  të mirat,

Uniformitetit  gjithë hijeshi…

 

 

AROMAT

 

Më rrahën aq e aq erëra të ftohta,

Asnjë ere nuk iu fsheha,

Të gjitha erërave ua fsheha gjoksin

Ato dridheshin para meje këmbëprera.

Nga lotët s`krijova stalagmite

Lotin e fshiva me një shpresë,

Po nga aroma jote tani po dridhem,

Gjithë erat  po hakmerren për besë…