Kostaq Duka: Përjetësisht borxhli

Kostaq Duka

Përjetësisht borxhli

-Triptik-

-Gruas në 60-të vjetorin e ditëlindjes-

Edhe pse hapat u bënë të ngadaltë

Të gjeta unë

a më gjete ti

kjo s’ka rëndësi.

Di që

çasti i takimit s’ish veçse magji.

Të gjeta unë

a më gjete ti

kjo s’ka rëndësi.

Di që asnjëherë s’e humbëm njëri tjetrin

në udhëtimin e gjatë.

Kurrë s’rreshtëm së zbuluari vlera

edhe pse hapat u bënë të ngadaltë.

Hiret

Hiret e bukurisë

vijnë e ikin me rininë.

Sikur vetëm ato të më falje

sot pa hiret e shpirtit

mjerisht do ndjeja vetminë.

Borxhli

Borxhin e kam urryer

se borxhi skllav të bën

e të detyron përuljen.

Ndaj e dashur

përpiqem e përpiqem të shlyhem.

Por as vetë nuk e di

si ndodh nga fati të dënohem

të mbetem para teje përjetësisht borxhli.

Qershor 2013.