Besar Shkëmbi: Kosë e ndryshkur në tavan

Besar Shkëmbi

Kosë e ndryshkur në tavan

Odës që dikur priste miq e dashamirë

I vjen era myk

Abetares në raftin e tejisur

Iu kanë zverdhur fletët

Oborrin e ka mbluar bari

Kosa është ndryshkur në tavan

Mexhen nuk ka kush ta krasitë

Sopata ka mbetur e ngulur në cungun e kalbur

Kaluan trembëdhjetë pranvera

Varret breg rruge pa u përtërit me një grusht dhe'

Shati ka mbetur në vijat e arës

Fshatarët kanë hequr emrin tim

Nga lista e rendit të vadës n'katund

Ara e madhe është bërë djerrinë

Te dera e oborrit askush nuk thërret

Askush nuk troket

Oxhaku nuk tymon

Eshtë mbyllur dera e konakut