E diele, 21.07.2024, 05:50 AM (GMT+1)

Përjetësi » Mani

Kadri Mani & Nazmi Sjarina: Kryetari Behgjet, në shtëpitë e skamnorëve u gjet!

E premte, 04.03.2011, 09:26 PM


Në vend të urimit të detyrës Kryetarit të Kosovës

 

Kryetari Behgjet, në shtëpitë e skamnorëve u gjet!

/Jo si  Enver Hoxha “gju më gju me popullin”, e sa për bujë, me çue dollinë me ujë!/

 

Nga Kadri Mani & Nazmi Sjarina

 

“Dhjetë familje skamnore ndajnë pagën e presidentit Pacolli

 

Shqipe Osmani, BOTA SOT

 

Presidenti z. Pacolli vizitoi familjen skamnore Bunjaku

Presidenti i sapo zgjedhur i Republikës së Kosovës, Behgjet Pacolli, edhe tani kur është në krye të shtetit,vazhdon traditën humanitare që e ka trasuar me vite e dekada si biznesmen i suksesshëm, dhe tani vazhdon humanitetin e tij, duke hequr kështu dorë nga paga e tij mujore si president për t’ua ndarë kështu 10 familjeve skamnore në rajone të ndryshme të Kosovës. Presidenti i Kosovës, z. Pacolli të dielën edhe pse ishte ditë pushimi ai vizitoi familjen e Naim Bunjakut në lagjen Dodona të Prishtinës, e cila jeton në kushte të rënda sociale me gruan dhe katër fëmijët e tij. Pas vizitës presidenti i vendit deklaroi se familja e Naim Bunjakut tash e mbas do të ketë një pagë mujore e ndarë nga paga e tij për punën si president. “ Isha në këtë familje dhe e di se në Kosovë ka shumë familje që kanë të njëjtin fat dhe unë me mundësit e mia sot isha këtu që t’i inkurajoj dhe të mos humbin shpresën këta njerëz ,sepse Kosova është duke bërë çdo gjë që të ketë rritje ekonomike dhe të krijohen mundësi të reja për familjet që kanë nevojë. Vizitova këtë familjen dhe ndaj të dhjetën e pagës sime mujore. Paga ime do të ndahet proporcionalisht për dhjetë familje”, shprehet Presidenti, derisa thekson se këto janë mundësit e tij personale. Ndërkohë nikoqiri, Bunjaku , shprehet falënderues për vizitën e presidentit Pacolli dhe ndihmën e ofruar për çdo muaj, duke theksuar se ndjehet i lumtur se Kosova ka njerëz të tillë. I pyetur nëse ka bërë shkelje ligjore me rastin e votimit të qeverisë, ai tha se kjo i përket Gjykatës të vendosë.”

 

 

“Ndihmon skamnorët

 

Nga Express më 27 shkurt 2011 në ora 16:56

 

Pacolli ndan pagën e tij për 10 familje skamnore

 

Kreu i vendit Behgjet Pacolli ka vendosur që pagën e tij mujore si president prej dy mijë e pesëqind euro ta ndajë për dhjetë familje të varfra të Kosovës gjatë vitit 2011. Njëra nga këto është edhe familja 6 anëtarëshe Bunjaku nga Prishtina, e cila deri më tani kishte jetuar vetëm me një ndihmë sociale prej 60 euro. 
Presidenti Pacolli të dielën ka vizituar këtë familje, me ç’rast ka thënë se ajo që e ka shtyrë të ndërmarrë një hap të tillë janë kushtet e vështira ekonomike-sociale në të cilat jetojnë qytetarët e Kosovës. 
“Unë në mundësitë e mia çka mundem të bëjë sot isha këtu që t’i inkurajojë që të mos e humbin shpresën, Kosova është duke bërë çdo gjë që të ketë një rritje ekonomike, që të krijohen mundësitë e reja për këto familje që kanë nevojë për mbështetje dhe unë në mundësitë e mija sot isha këtu dhe 1 të dhjetën e pagës time mujore do t’ua lë. Do të thotë paga ime do të shkojë në të ardhmen për dhjetë familje, do t’u ndahet proporcionalisht dhe një prej familjeve që është ndër këto dhjetë familje është edhe familja juaj”, u shpreh presidenti Pacolli. 
Kryefamiljari Naim Bunjaku nga ana e tij ka falënderuar presidentin Pacolli për ndihmën e ofruar. 
“Unë shfrytëzoj rastin vetëm të falënderoj presidentin e Republikës së Kosovës për këtë vizitë që na ka bërë sot, edhe jam i nderuar shumë që kemi kësi njerëz në Republikën e Kosovës”, ka thënë Bunjaku. 

Pas përfundimit të vizitës në këtë familje, presidenti Pacolli ka vizituar edhe familjen e Shaban Avdylit në Pojatishtë të Ferizajt. /kosovapress/”
- edhe ne dy shkruesit e këtyre radhëve jemi nga Gallapi dhe me tradita pozitive pune e lufte...

Gëzohemi që bashkëvendasi ynë, Behgjet Pacolli, si askush deri më sot, e tregoi humanitetin e vet në praktikë, aq dorëlirshëm, sikur ne që ia lëshojmë në dorë ca kacidhe ndonjë lypsari në rrugë, ai e la rrogën mujore-vjetore në 10 familje skamnorësh!!

Është një ogur i bardhë shprese e sihariqi për krejt Republikën e Kosovës, për krejt rajonin dhe botën! Se në këtë botë me ligje xhungle (ku i madhi gëlltit të vogëlin), ka edhe një tjetër botë traditëlashtë iliro-pellazge që po vie në shprehje pikërisht nga Malësia e Gallapit: Mareci i shpresës së mirë (Rushit Ramabaja).

Zotni Behgjet Pacolli, para se të njihej me Jelcinin, është njohur me Miteranin, dhe ky (Miterani) i ka telefonar Jelcinit se po jua dërgonte një ndërtimtar, mik besnik të vetin!

Zotni Behgjet Pacolli po lobonte për pranimin e Kosovës së pavarur më tepër se krejt shteti i Kosovës!

Tash që e mori vendin që i takonte, ka edhe fuqi reale që çështjen shqiptare ta shpie përpara!

Një anekdotë nga Mareci (Mareci i shpresës së mirë): një katundar e kishte bërë një pazar me zarar, por nuk donte t’i bie pishman, paçka se po e “këshillonin” që t’i bie pishman!

-Ko bre, burri një herë flet...

-Hajt ebu se kurrgjë nuk është, theje një krande përmbi krye (në Gjakovë me thye një copë bukë përmbi krye) prishet betimi, pa hy në gjynah.

-Çka!?- jo një krade përmbi krye, po me ma thye krejt malin e Feratit për krye, se pishman nuk i bie!

Gëzuashi zotni Kryetar!

Rrnofshi sa malet tona!



(Vota: 8 . Mesatare: 2.5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora