Kulturë
Dy vjersha për fëmijë nga Skënder R. Hoxha
E marte, 28.12.2010, 05:47 PM
SKËNDER R. HOXHA
(Dy vjersha për fëmijë)
KËNGA E PËRROIT
Nëpër fshatin tim
që quhet PLEPISHTË
gjarpëron një përrua
ograjë e lajthishtë.
Këndon këngë të bukura
me atë gurgullimë,
muzika e komponuar –
e zogjve cicërimë.
Përroi i Plepishtës
fëmijëve u këndon ninulla
që i ruajnë në kujtesë
edhe kur të bëhen burra!
Dimrit përmbi akull
fëmijët lozin me saja
përroi në gjumë të rëndë
atyre u tregon përralla…
DY FËMIJË
KUVENDOJNË PËR VITIN E RI
Agroni: Dëshirë të madhe kam
që çdo Vit i Ri
të jetë më i MIRË
edhe më i DËLIRË!
Teuta: FËMIJËT E GJITHË BOTËS
të mësojnë pa përtesë
në GJUHËN E NËNËS
pa asnjë pengesë!
Agroni: Çantat e SHKOLLARËVE
të jenë – LIBRA plot
urrejtja të flaket
çdokund në botë!
Teuta: Krismën e armëve
e kam mëri
për tanke e bajoneta
S’DUA AS TË NDIJ!
Agroni: Fjalët VARFËRI
as të të vegjëlve URI
të mos i dëgjoj KURRË
këtë e kam DËSHIRË!
Teuta
e
Agroni: Urra, urra, urra!
drejt DITËVE të MIRA
që çdo Vit i Ri
t’na i PLOTËSOJË
këto DËSHIRA!
(1995)