Konferencë për shtyp e organizuar nga Këshilli Pedagogjik i Mësuesve Shqiptarë në Greqi

Ky rrezikim vjen për shkak se nuk na kanë ardhur tekstet mësimore dhe disa materiale të tjera shkollore, që Këshilli ynë i ka kërkuara Ministrisë së Arsimit dhe Ministrisë së Jashtme në Shqipëri. Kërkesa për tekste është bërë që ma datë 11 maj  2010 dhe tashme duhet të ishe mbyllur, pasi shkolla nis në muajin tetor.

Kërkesat tona për tekste shkollore kanë  qenë për; Abetare dhe Paraabetare, tekste të Gjuhës Shqipe, komplete mjetesh mësimore për Ciklin e Ulët; programe të unifikuara për mësimin plotësues të Gjuhës Shqipe; metodika në ndihmë të mësuesit; regjistra, harta, amza etj...

Kërkesat tona nuk janë të mëdha, por dua të theksoj së akoma më e madhe është rëndësia e tyre, sepse me këto libra mundësohet mësimi i Gjuhës Amtare për fëmijët e emigrantëve shqiptarë në Greqi.

Kështu realizohet një e drejtë themelore kushtetuese, lidhur me mësimin e Gjuhës së Nënës dhe njëherazi, ruhet identiteti i tyre kombëtar.

Këtë mision, sa fisnik aq edhe atdhetar, përpiqen të realizojnë qindra mësues emigrantë shqiptarë në Greqi, që krahas punës së përditshme, u zhvillojnë vullnetarisht (pa asnjë pagesë) fëmijëve bashkëkombës mësimin e Gjuhës Shqipe.

Prandaj ne mësimdhënësit e shqipes me të drejtë u drejtohemi drejtuesve të Ministrisë së Arsimit dhe të Ministrisë së Jashtme që të plotësojnë urgjentisht kërkesat tona për tekste e mjete mësimore, me dëshirën e mirë që viti mësimor 2010-2011 të nis normalisht, dhe se çdo vonesë është mungesë përgjegjësie prej tyre.

Çështja e dytë

     2. Dështoi pjesëmarrja e mësuesve tanë në Seminarin e Vlorës, 26-28 korrik 2010

Kërkesën për pjesëmarrjen e mësuesve tanë në këtë Seminar (që organizohet çdo vit), ia kemi dërguar MASH-it që në fillim të muajit qershor të këtij viti. Ndërsa njoftimi zyrtar nga MASH (për pjesëmarrjen tonë në seminar) na erdhi pasi seminari në fjalë kishte përfunduar. (unë i kam të dokumentuara njoftimet që MASH na ka dërguara në adresë tonën).  Kjo gjë solli pamundësinë e pjesëmarrjes sonë në këtë seminar. Kjo tregon thjesht paaftësi organizmi nga Ministria në fjalë.

Çështja e tretë

3. Bëhet vesh i shurdhët edhe ndaj disa kërkesave tona të përsëritur prej disa vitesh në drejtim të MASH, si:

1.                               Përgatitja e programeve dhe teksteve të posaçme për nxënësit emigrantë;

2.                              Pajisja e fëmijëve me dëftesë pas përfundimit të mësimeve plotësuese të gjuhës shqipe, me qëllim vazhdimin e arsimimit të mëtejshëm në Shqipëri;

3.                              caktimi i një pagese për mësuesit shqiptarë që ushtrojnë mësimdhënien (tashmë prej afro 15 vitesh), si dhe njohje e kohës së saj si vjetërsi pune; (përllogaritur në normë mësimore);

4.                              Ngritja në Ministrinë e Arsimit dh Shkencës në Shqipëri, e një strukture të posaçme (Drejtori apo Sektor), që të merret me arsimin shqip për emigrantët dhe Diasporën, si dhe buxhet të veçantë.

5.                              Rinovimi i Marrëveshjes dypalëshe të 4 Nëntorit 1998 midis dy ministrive të Arsimit, të Shqipërisë dhe Greqisë, duke bërë të mundur mësimin e gjuhës shqipe fëmijëve në shkollat greke ku mësojnë dhe gjuhën vendase.

Jemi të bindur se mosplotësimi i kërkesave tona vjen jo nga “varfëria” e shtetit shqiptar, por nga mungesa prej saj e një strategjie “kombëtare” për ruajtjen e identitetit e mësimin e gjuhës shqipe në diasporë.

Në këto kushte Këshilli Pedagogjik i Mësuesve Shqiptarë në Greqi është i detyruar të kërkojë:

-         Angazhimin e MASH dhe Ministrisë së Jashtme, si institucione te specializuara të cilat përgjigjen direkt për problemin në fjalë.

-         Vëmendje nga Presidenti i Republikës z. Bamir Topi, krye parlamentarja zonja Jozefina Topalli, dhe kryeministri i vendit z. Sali Berisha, si dhe nga i gjithë spektri politik, media dhe shoqëria civile, pa anashkaluar kontributet e bashkive, komunave dhe bizneseve të nderuar.

Duke mbetur në pritje të realizimit të sa më sipër, dëshirojmë t’ju sigurojmë se, pavarësisht nga rrethanat, mësuesit emigrantë, të organizuar në Këshillin Pedagogjik në Greqi, nuk do të ndërpresin asnjëherë përpjekjet e  tyre për realizimin e misionit fisnik e atdhetar, për ruajtjen e identitetit kombëtar të qindra mijë fëmijëve e të rinjve në Greqi, nëpërmjet mësimit të Gjuhës Amtare.

Ju falënderojmë për mirëkuptimin!

z.Jovan Mëhilli, drejtues i KËSHILLIT PEDAGOGJIK TË MËSUESVE SHQIPTARË NË GREQI.