Kulturë

Skënder R. Hoxha: Atje dergjet dashuria jonë

E premte, 04.12.2009, 08:07 PM

ATJE DERGJET DASHURIA JONË

(Poezi)

SKËNDER R. HOXHA

1.ÇDO KUJTIM KA NGJYRËN E DASHURISË SONË

ISHIM DY DASHNORË TË LUMTUR
NA SHOQËRONIN HIJET E HËNËS NË BAR
SHTRAT I NATËS NA PRISTE NJË HERË NË JAVË
JETA PËR NE S’KISHTE FUND AS VDEKJE.

TASH PO TË THEM KUR
PARA MË SHUMË SE TRI DECENIESH
ËNDRRA MBAROI U NDAL LUMË I AGIMIT
NUK PRES GJË TË VIJË ME HAPA TË BLERTË.

NE JEMI DRIDHJE TË KOHËS QË KALON
E DASHUR – T’I DI ËNDRRAT E SYVE TË TU
QIELLI TË AFRON KAH DUART E MIA, POR
PAMUNDËSIA THYHET NË DIELLIN E SHKREHUR.

HIJESHIA E SAKTË E DASHURISË SONË
MË PËRVËLON GJITHMONË SI ACARI
NDAJ SA MË SHUMË QË KOHA IKËN
UNË KËNDOJ PËR HËNËN NGJYRËN E NETËVE TUA!
PËR ZËRIN TËND TË HESHTUR TË MATUR
DERI SA VIJE NË KRAHARORIN TIM
DJERSËT TONA TAKOHESHIN HARMONISHËM
KRISTAL SI VESA NË BAR SI TISI NË PEMËT PËRRETH…

UNË EDHE ATËHERË ISHA POET
E TË DASHUROJA TY ANALFABETE
PËR PADJALLËZINË, FISNIKËRINË TËNDE
VIRGJËRINË, SHPIRTDLIRËSINË FISNIKE
ISHA GATI TË VDES PËRDITË PËRNATË
E TË NGJALLEM ME KOKË NË PREHËRIN TËND
E TË MBULOHEM ME SHKËLQIMIN TËND
E FLOKËT E TU TË MË ZËNË FRYMËN…
TI QË PËR PESË VJET DASHURI-FLORI
MË DITE, MË DASHUROVE PËR KALORËS
QË S’I TREMBESHA TERRIT, PUSIVE TË NATËS
MERITOVE DASHURINË E POETIT AVANTURIER
DHE TË PËRULEM PËR DINJITETIN
PËR SFIDAT E RREZIKSHME QË I MPOSHTE
GRUSHT HELMI THIKA TË PËRGJAKURA
TË DREJTUARA KAH UNË DASHURIA JONË
QË I KURDISTE SMIRË E MALLKUAR!

GJITHMONË MË BËHET SE KAM BORXH
NË ËNDRRA MË NDJEKIN HAPAT E TU TË LEHTË
UNË LASHË PENG OFSHET NË VENDE TAKIMESH
NË NETËT KUR HËNA E LULËZUAR NA PENGONTE.

SHPESH KUR BJEN MUZGU N’DUKAGJIN
MË PËRFYTYROHET KODRA ME LISA
AI TEMPULL I DASHURISË SONË –
KU UNË E TI NË ORËT E VONA TË NATËS
KISHIM TË CAKTUAR TAKIMIN E RADHËS.
DERI RRETH AGUT MBRETËRONTE IDIL I THJESHTË
MË DUKET AI VEND TEMPULL – GOLGOTË
NE TË DY KAPËRCENIM YLBERIN
DASHUROHESHIM, PËSHPËRISNIM SI ZOGJ
POR PËR TË ARDHMEN NUK MUND TË PREMTONIM
(KËTË E KEMI DITUR EDHE NË FILLIM)
I VETMI PENG I DASHURISË SONË!
POR, DESHËM QË TË DASHUROHEMI
NE TË DYVE TË NA PLAGOS FATI!
NË MUZGUN QË NUK E DËSHIRUAM
SI DY TRËNDAFILA TË VARROSUR NË PYLL
KUR VJESHTA NGJITEJ NË FRONIN E VET.

ÇDO KUJTIM IMI KA NGJYRËN E DASHURISË SATE
S’DI A E KUPTON A E MERR ME MEND?
ËSHTË AI GJERDAN I PASKAJSHËM DITËSH TË ËMBLA
QË THURËN KËSHTJELLËN TONË MAGJIKE…

2. FSHAT I PËRGJUMUR
NË NJË LUG TË DUKAGJINIT

KUR KUJTOJ ÇUKAT NË FAQE E VETULLAT TUA
SI BISHT I DALLËNDYSHES NË ÇATINË E SHTËPISË SË VJETËR
U NGJAJNË PRANVERAVE TË IKURA NË PAKTHIM
POR UNË ME TO HARROJ QË S’TË KAM PRANË!

NJË ERË E FURISHME ULURON JASHTË
AJO VRET FLUTURAT KAFSHON GËZIMIN TIM
TY NUK TË SJELL E NË MUA ZGJEROHET ERRËSIRA
TY QË U MËSOVE ME SHPIRTIN TIM TË REBELUAR
ASHTU U BËRE MBRETËRESHË E NETËVE FSHATARAKE
SHEMBULL I ATYRE TAKIMEVE QË NUK PËRSËRITEN
KUR YJET DIGJESHIN LART E NE PRITNIM NË PREHËR
DËSHMITAR E KAM VEÇ QIELLIN E HAPUR
QË PAU NJËMIJË PUTHJE TONA TË ZJARRTA
QË VARROSESHIN SI METEORËT!...

EMRIN TIM ENDE DO QEN E NDJEKIN PO S’PRISH PUNË,
JE MBRETËRESHË E GJITHËSISË SE STINËT M’I FALE MUA.
NË SHPIRTIN TIM PIKON VESA E LIVADHEVE E SHPIRTI VUAN
HARRIMI BËHET MË I GJATË SE DASHURIA MJEGULLA
ISHTE AJO NDARJE NORMALE E PRITUR PA FAJIN TONË – DHIMBJE.

E KAM DITUR SE KURDOHERË
DO TË SHKRUAJ VARGJE PËR TY
(POR, JO KAQ VONË, PAS TRIDHJETË VJETËSH)
QË I MERITOVE MË SHUMË SE DASHNORET TJERA
NUK ËSHTË KJO DHIMBJA E FUNDIT
AS RRESHTAT E FUNDIT PËR TY –
DROJ SE BUTËSINË E SHPIRTIT TËND
NUK KA FJALË AS VARG QË E SHPËRBLEN.
MIRËPO, TI E DASHUR KUDO QË TË JESH
EDHE NË ËNDËRR EDHE PAS VDEKJES KUJTOJE
SE KE QENË E DASHURA E AVANTURIERIT TË SHKOLLUAR
DASHURI E DËNUAR QË S’E NDALI NDARJEN…

I QUAJ TASH GËRMADHË ATO VENDE ATË ZABEL
KAH U THUR U RRIT U SHEMB DASHURIA JONË –
NEVERITSHËM E KUJTOJ KURRË S’E SHKELA MË
A KUJTIMET PËRPIQEM T’I SHPËTOJ NGA PËRMBYTJA
ZOGJTË SIGURISHT KËNDOJNË: ME THEKS TË DHEMBSHËM
NË ATO PEMISHTE TË VENITURA MELANKOLIKE
ATJE KU FLENË KËNGËT TONA.

ATË VEND TË BRAKTISUR –
QË DIKUR I DHAMË HIJESHI
UNË
E TI
E DASHURIA
NDONJËHERË DHEMBSHËM E SODIS PREJ SË LARGU.
E DI SE TI MUND TA VIZITOSH SHPESH
POR PA MUA TAKIMET TONA T’I KUJTOSH…
AI VEND QË NJË KOHË TË GJATË ISHTE
KONAKU I DASHURISË SONË!

ATIJ ZABELI DO IA VËJA EMRIN –
PYLLI I DASHURISË
PO, AI PEIZAZH I URUAR…

3. ATY KAFSHONIM FUNDIN E DASHURISË

ATYRE NETËVE TË EGRA TË ZJARRTA HAJDUTE
NË SHTËPI LËJA KANDILIN QIRIUN NË KTHINË
ME VETE E MERRJA FANARIN – BATERI XHEPI
NË RRUGICA ARA KODRA MONOPATE
MË PRISNIN XIXËLLONJAT UDHËRRËFYESE VERE
MUZGJEVE TË MIA TË VONUARA PREJ KUSARI ROMANTIK.

NDONJËHERË TË VËJA KURORË LULESH
TË DY E DINIM SE KJO ISHTE SHAKA DASHURIE
NË PROZHËM ME ZOGJTË E NATËS DASMORË.
BUZËT I LAGJA ME PAK “VINJAK” NGA XHEPI
NJË RRISKË ÇOKOLATË E HANIM BASHKË
(ANDEJ GARDHESH LEHNIN QENTË)
U DOGJËN TRUPAT KUR SHIKOJE DEGËT
YJET VAZHDONIN LOJËN E TYRE RUTINË
NË NATËN E SKUQUR QË I AFROHEJ AGUT
NE KAFSHONIM FUNDIN E HIDHUR TË DASHURISË
A S’ISHTE DASMË JONA KJO?!!!

KUR U MARTOVE TI
UNË DASHUROVA EDHE TË TJERA
S’TË DUKET VUAJTJE KJO?

POR –
TI MBETE DASHURIA IME MAGJIKE…

4. ATJE DERGJET DASHURIA JONË

NË PËRVJETORË TË DASHURISË SONË
PESËVJEÇE TË VARUR NË BUNGISHTË
I NIS NGA PESË PËLLUMBA TË SHKOJNË
ATJE KU KANË MBETUR NETËT TONA TË THINJURA
PESË PËLLUMBA FLUTUROJNË PA PËRTESË
KRAHËHAPUR SODISIN ZABELIN LISAT E MOÇËM
NUK SHOHIN GJURMË TONAT – JANË FSHIRË
PESË PËLLUMBAT E BARDHË FLUTUROJNË E KTHEHEN
PAS GJEZDISJES NË ERË MË RRËFEJNË:
SE ATJE NË KODËR DERGJET DASHURIA JONË…

(Tetor 2009)

(Vota: 51 . Mesatare: 5/5)