Kulturë
Albërie Hadërgjonaj: Presidentit Rugova, mitit tonë!
E hene, 16.03.2009, 10:13 PM
Presidentit Rugova, mitit tonë!
Nga Bruna Merko, BOTA SOT
Albërie Hadërgjonaj himnizon veprën e Ibrahim Rugovës me këngë
“Oh moj Dardani antike/ Gjuaje vellon e lartësisë/ Rrok lahutën ti kreshnike
Për babain e pavarësisë/ Çka tha Ibrahim Rugova/Në Prishtinë kur mbylli sytë
Moj Kosovë për ty punova /Siç punon qiriu për dritë/Kur n’Kosovë ende Dardani”
Janë këto vargjet që këngëtarja e mirënjohur shqiptare ia dedikon liderit tonë historik Ibrahim Rugovës, e titulluar “Nderi i kombit”.
Këngëtarja ka deklaruar për median se kjo ka qenë një dëshirë e kahershme për t’i kushtuar një këngë ish-presidentit, sepse, sipas saj, “Rugova do të mbetet për të një mit”. Ndërsa teksti i këngës është tejet i goditur duke e përshkruar jo vetëm misionin politik të Rugovës, por dhe personalitetin e tij.
“Se ti je Gandi i Ballkanit
Që me pëllumb luftën e vret
O moj Dardani antike
Moj e shtrenjta nanë Kosovë
Ç’tha Ballkani, ç’tha Evropa
Për ty Ibrahim Rugovë
Emnin tënd ka marrë bota
me beku lirinë n’Kosovë”
Vetëm disa ditë më parë Albëria e promovoi këngës e saj, muzika e së cilës është nga Luan Zhegu, orkestrimin Shpëtim Saraçi, ndërkaq tekstin Gjok Beci. Ka gati një vit prejse kënga është e realizuar, mirëpo ka pritur momentin e duhur për ta publikuar, bashkë me videoklip, punuar nga “Entermedia”. Ndërkaq, Albëria, pas interpretimit shumë me zemër që i ka bërë këngës, ka thënë se të flasësh për presidentin tonë të madh, e ndjen veten shumë të vogël, duke e lartësuar kështu figurën e tij. “Sa herë e dëgjoj, emocionohem. E dëgjoj dhe e dua edhe më shumë, ndoshta sepse e kam dashur e respektuar presidentin Rugova. Është kënga që e dëgjoj me qejf dhe kurrë nuk më mërzitet” , thotë ajo.
Albërie Hadërgjonaj
Një këngë, një videoklip, që tregon pamje historike nga veprimtaria kombëtare e një prej liderëve historik shqiptar, Presidentit Ibrahim Rugova.
Interpretimi brilant i këngëtares Albërie Hadërgjonaj na kthen pas në kohë, atëherë kur presidenti ynë, diplomati i shquar realizonte një sërë takimesh për Pavarësinë e Kosovës.
Videoklipi është zhvilluar në atë që quhet sot Shtëpia e Pavarësisë “Ibrahim Rugovës”, ndërsa në sfond jepet Presidenti Rugova.
Kjo këngë është përfshirë në albumin më të ri të këngëtares Albërie Hadërgjonaj, i cili doli në shitje këtë vit.