E hene, 04.03.2024, 02:01 AM (GMT)

Kulturë

Visar Zhiti: Në Pejën e poetit Azem Shkreli

E shtune, 10.02.2024, 07:52 PM


NË PEJËN

E POETIT AZEM SHKRELI

- Panteonik -

Nga Visar Zhiti

E njoh poetin e këtij qyteti,

jemi takuar 3 herë,

ndërkaq qyteti tani

                                   është bërë i poetit,

mund ta gjesh gjithandej...

Herën e parë e pashë, kur unë

                                  do të vdisja,

herën e dytë: po vdiste një kohë

         e unë po dilja nga ferri,

herën e tretë: unë isha pakëz i gjallë

                                 dhe ai pakëz i vdekur,

ishte libër më shumë,

ishte dhe kujtim,

jo, në fakt ishte kujtesë dhe frymë,

na jepte frymë, dua të them.

E dua qytetin e poetit

që përkujton,

        ashtu si luftën  dhe qëndresën,

                                        dhe poezinë e tij,

që nëpër pemë shikon shtatin e jetës

                                                         së poetit,

që nëpër rrugë ndjek ecjen

                                e vegimeve të poetit,

që nëpër drita merr dritën e syve

                                                      të poetit,

që nëpër fjalë risjell zërin e poetit,

se ikja e tij është ardhje,

se kthimi i tij është frymëzim,

se vepra e tij është liri,

se vdekja e tij është mosvdekje...

E dinte ai një fjalë prej guri,

po cila është? - pyesja unë.

Ai heshtte dhe buzëqeshte.

Shkoi në qiej

dhe kur zbriti prapë në tokë,

           i plasi zemra si një zog,

                                            që bie i goditur.

Befas e mësova dhe unë atë fjalë,

po e them shpejt e shpejt se do të iki,

                                  është emri i tij tani.

Po Pejë ç’do të thotë? -

mund të më pyesin, kur të mbërrij.

Pe, eja... Pe-ej... Shikove? Të shikosh

do të thotë

                       të nxësh. Të vish,

do të thotë se duhesh... Janë

fjalë prej guri,

    kanë lidhje me kohët që ikin e vijnë,

punë perëndish,

ose poetësh, desha të thosha...

Durrës-Pejë, 21. 05. 2011

—————————————————

(Me rastin e 86 vjetorit të lindjes

së poetit Azem Shkreli,

nxjerrë nga libri me poezi “

“Si është Kosova”,

botimet “Buzuku”, Prishtinë 2014)



(Vota: 0)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora