Blerim Rrecaj: Lojërat tranzicionale

Blerim Rrecaj

Lojërat tranzicionale

Pak minuta para orës shtatë u zgjua gruaja

Pak minuta pas orës shtatë u zgjova unë,

Erdhëm të dy në sallonkuzhinë

Fëmijët nëpër shtretër i lamë në gjumë.

Gruaja përgatiste për ne diçka në fëltere

Dy xhezve mbi shpotet i vura unë,

I pijmë pastaj kafetë as me nge e as për ngut

Dhe përcolla gruan që u nis për në punë.

Hyra në dhomë të gjumit ku flinte djali i vogël

Në dhomën e fëmijëve flinin dy vetë,

Zili ia pata edhe këtij gjumi ku flinin

Djali ynë i madh me djalin e axhës së vet

Erdha në sallonkuzhinë dhe për dy orë të mira

Humba siç di të humb ndonjëherë nëpër facebook,

Vërtitem duke lënë ndonjë urim e “like”

Dhe lëshoj këtë copë bote nga duart disi urtë e butë.

S’di çfarë të bëj e ngritem nga fotelja

Vështroj pjatën e mbushur me “chicken nuggets”,

Në shporet mora tepsinë me copën e mbetur të flisë së djeshme

Ndërsa pjata e mbuluar me letër alumini fëmijët po i pret.

Mbërriti mesditë e dielltë e pragvjeshtës

Lë diku mënjanë telefonin mençurak,

Me hap prej kreshniku të përrallës

Filloj dalngadalë po përgatis për veten një çaj.

Fijet e çajit të malit i hodha në gjygym

Mbi to hodha ujë dhe tash po pres,

Është çaj mali i një cope të natyrës shqiptare

Ardhur nga një fabrikë në Durrës, diku në Shkozet.

U zgjuan fëmijët baterimbushur gjumë

Do nisemi edhe pak por jo për në shkollë,

Vazhdon grevë e nisur dhe mësimi nuk filloi as sot

Ndonëse duke fluturuar është ky shtator.

E marrin topin e ndonjë lodër me vete po shkojmë të luajmë.

Ç’të bëjmë tjetër e ç’mund të bëjmë ne?

Kushdo që luan me ty prishja notën e sjelljes

Dhe notoje siç e meriton në ditarin tënd Atdhe!