Xhemal Ahmeti: Islami tradicional mund të jetë vetëm osman e jugosllav

ISLAMI TRADICIONAL MUND TË JETË VETËM OSMAN E JUGOSLLAV

Kështu verdikti i fakteve historike

Nga Xhemal Ahmeti

Shqetësues është fakti se shumica e deputetëve shndërruan Parlamentin e RK në xhami. Ata argumentuan kundërshtimin e një kodi nga perspektiva e shkollave parajurudike monoteiste abrahamite. Deputetët Balje dhe Basha e vazhduan debatin po në këtë mënyrë; duke akuzuar njëri tjetrin për mungesë të devotshmërisë. Basha i sugjeroi Baljes ta vesh ferexhen. Kjo e pandehi atë të deformuar për shkak të infektimit të pashërueshëm me kulturë amerikane, kështu duke i bërë stilit jetësor amerikan portretin e djallit anti-islam. Balje u thirr në islamin tradicional; cilin? Atë të kohës së komunizmit jugosllav apo atë të kohës së perandorisë osmane? Sepse nëse flasim për islam tradicional ai është i mundshëm vetëm brenda këtyre dy etapave. Tradita e praktikimit u krijua nën sundimin osman, serb dhe atë jugosllav. Shqipëria siç dihet ishte ateiste deri dje. Identiteti politik “boshnjak” është produkt i komunizmit jugosllav. Ashtu siç është edhe identiteti politik ortodoks sllav i Maqedonisë Veriore. Po aq siç është "identiteti" mysliman i shqiptarëve produkt i kohës osmane dhe atij të komunizmit jugosllav. Kosova mirëpo, shteti, ky shtet nuk është produkt i këtyre etapave dhe ideologjive. Ose është por si kundërshti e tyre. Si konstrukt dhe ekzistencë është produkt shqiptar dhe amerikan. Është finalja e një luftë shekullore kundër dy të parave dhe shumë tjerave. Një luftë që nuk do të triumfonte pa amerikanët – se Balje, Basha dhe gjithë tjerët aty morën shansin të futen në parlament është meritë e një luftë të gjatë shqiptare për liri e pavarësi: nga osmanët, serbët, jugosllavët. Për shkak të tendencës së deformimit të një institucioni si Kuvendi në plenum homeinësh dhe degradimit të shtetit si instrument banal të gjithë atyre feve e sekteve, kryesia e Kuvendit duhet ta mendojë mirë këtë punë. Kosova nuk është republikë islamike. Ose po?