Qazim Shehu: Përjetim

PËRJETIM

 

QAZIM D. SHEHU

 

Si një zjarr që bie nga mesi

I lartësive pa fuqi,

Sytë e tu lojën ndezën

Dhe ndritën për mua përsëri.

Dritën e tyre e afrova

Në vatër të zemrës së përpëlitur,

Dhe kur drejt teje dorën hodha

Sytë ishin mbyllur.

 

 

LOT I VOGËL

 

Nën peshën e një loti thërmohet

Pafuqi e botës.

Prej turbullisë së tij shkohet

Gjer në skaj të lodhjes.

 

Ç`të jetë kjo peshë që dridhet si uji,

Kur bie përherë të parë nga shkëmbi,

Pastaj në humnera i thyen gjunjët

Dhe nuk i dhembin?

 

Sa zjarre, dëshira ,dhimbje

Sa pamundësi ,dridhje ka?

Ky loti i vogël si një thinjë

Që kufiri i moshës nuk e pa?...

 

 

KRYQE

 

Kryqe pendese bëhen

Ca gishta

Që shkruan në tastjerë

Fjalëgërvishtëse.

Po gishtat mund të bëjnë shqiponjën

Mund të bëjnë forma të tjera,

Sidoqoftë e vijojnë lojën

Imagjinueshëm si përhera…

 

 

ARBËRISHTE

 

Ti në një anë tjetër të kuptimit

Në tjetrën unë,

Po ku është kuptimi?

Kuptimi i ngjet blerimit

Qe ditën vesh rreze

Natën zhgunë.

Ti në anë tjetër të deshifrimt

Të fjalës që lodhet pa dhunë

T`i ikë asgjësimit

Murgut Gjon Buzuk po i hapim punë

Në arbërishte të magjijimit…

 

 

BISHTI

 

Kur kujtoj gjyshërit me mjekër

Këta plistarë të fjalës,

Një bisht gjarpri me del tepër

Në zgollë të përrallës.

 

Dikush ia këputi bishtin,kokën

Nuk mundi t`ia shtypë,

Kur gjarpri të vijë,tokësi

Veç hijen e tij do lypë…

E bëmë lak të varim

Fjalën pa kripë…

 

 

VARJE

 

Nga gjithë varjet më pëlqen

Të varem në një rreze dielli,

Ta shoh lakun e saj si shkëlqen

Me smeralde qielli.

 

Kur fronin nga këmbët ta rrëzoja

Së pari do rrëzoja shkëmbinjtë,

Këta mëkatarë që iu tha goja

Duke pritur të puthin qiejt...

 

 

ERËRAT E DËSHTIMIT

 

Erërat e dështimit

Nga një horizont i panjohur,

Po fryjnë.

 

Duart e kërkimit me frymë besimi i kam ngrohur.

Kam rrëmihur me to mijëra kërkesa

Lutje, epifani e prapë lutje,

Në krifë horizontesh të lodhur

Horizontin e panjohur s`e shihja pak më tutje.

Erërave të dështimit

T`u çoja një fjalë për zbutje…

 

 

PUTRIM

 

Krahët e erës nuk janë krahë dashurishë

Krahët e dashurisë më të ajërt mbeten

Ndoshta prandaj era ulërin si bishë

Se këto krahë ende s`i ka gjetur…

 

 

FRYMOJ

 

Zhagitem,bërllokem

Në jetën e mrrolët,

Frymoj,

Molla e Evës

Në dy gjysma hapet,

Mjeroj…