Demir Krasniqi: Shtazë e shpezë po shkojnë te Zoti

SHTAZË E SHPEZË PO SHKOJNË TE ZOTI

(Rapsodi humaniteti)

 

Sillet bota , sillet moti –

Shtazë e shpezë po shkojnë te Zoti !

Shkojnë te Zoti , me u ankua –

Nga njerëzimi  me shpëtua !

 

Shkojnë te Zoti,  t’iu bëjë  çare –

Për t’ shpëtuar pa dalë fare !

Sepse njerëzit me dëshirë –

Po i shkatërrojnë hiq pa mëshirë !

 

Lopa :

 

Lopa  e  shkretë po qanë me lot –

Më ndihmo ,  o i Madhi Zot !

M’ i dëgjo hallet e mia –

Çka po bëjnë mbi mua njerëzia !

 

Unë kulloti në  lendinë –

Me qumësht tim i rrisin fëminë !

Iu jap djathë e shumë bylmet ,

Por ata nuk kanë rahmet !

 

Iu jap mëzet e iu jap mështjerra ,

Edhe shumë  dobi të tjera !

Mëzet e mështjerra po m’i shesin ,

Shumë prej tyre po m’ i presin !

 

Edhe unë kur do të  plakëm –

Vijnë me kosë ma këpusin qafën !

Pa mëshirë ma rrjepin lëkurën –

Me mish tim e mbushin furrën !

 

Kau :

 

Nisi Kau me u ankua –

Edhe n’ mua zullum kanë shtrua ,

N’ punët ma t’ rënda m’ kanë angazhua ,

N’ plug në ara me i lëvrua !...

 

Kurrë prej qafës s’ ma  heqin zgjedhën ,

M’ ngarkojnë sajin , m’ ngarkojnë qerren !...

Kur t’ vjen dimri mezi presin –

Kokën time që t’ ma presin !

 

Kokën time kur t’ ma therin –

Mishin tim n’ tavan ma terin !

Hanë prej meje pleq e shtriga ,

Lëkurën time e bëjnë opinga !

 

Kali :

 

Para Zotit , Kali ka dalë –

Zot i Madh , të qofsha falë !

Kurrë zullumin s’ janë tu ma ndalë –

Me fre n’ gojë , mbi shpinë me shalë !

 

M’ qojnë n’ mulli e m’ qojnë n’ pazar –

Të ngarkuar plot me barrë !

N’ vapë të madhe m’ qesin n’ lamë –

Unë fshijë duaj – e  bëjnë  piskamë !

 

M’ hipin n’ shpinë , poshtë e përpjetë  –

Mbi mua qesin salltanet !

Ku t’ dëgjojnë se bëhen dasmat –

M’ qojnë n’ vrapime t’ua marrë maramat !

 

Kur për mua s’ kanë nevojë fare –

M’ çojnë n’ pazar m’ shesin me pare !

Kur të plakëm e t’ ndërroj jetë –

M’ qesin n’ përrua si trup të shkretë !

 

Gomari :

 

Para Zotit ,  qanë Gomari –

Kurrë prej shpine s’ mu hoq samari !

M’ është mërzitë shpirti n’ këtë jetë –

Me barrë t’ rënda poshtë – përpjetë !

 

Nëpër male e nëpër  vërria –

Kurrë prej shpine s’ më zdrypë zotëria !

M’ hipin gra e m’ hipin bija ,

M’ hipin fëmija e çobania !...

 

Delja :

 

Nisi Delja , flet me Zotin –

Nuk ia priste loti – lotin !

Zot i Madh , a ma banë lehtë ,

Shumë  po vuaj, unë ,  në këtë jetë ?!

 

Po u jap qumësht fëmijët me e pi ,

Mazë e djathë me bukë me u ngi !

Vjet për vjet po iu jap lesh –

Me i punua mbathë e veshë !

 

Por shumë shpejtë po i harrojnë t’ mirat –

Për pak punë po m’ vijnë te grigjat !

Po ma zgjedhin ma t’ mirin  kingj –

Po ma presin me ngrënë me miq !

 

Kur po vjen Kurban Bajrami –

N’ fëmijët e mi po bahet nami !

Pa mëshirë po iu pritet koka –

Plot me gjak po mbushet toka !

 

Po mi lanë delet pa burra –

Piqet mishi nëpër furra !

Me mish t’ deshve s’ kanë të ngimë –

Po mi lanë qengjat jetimë !

 

Dhia :

 

Para Zotit , doli  Dhia –

Dëgjo Zot , hallet e mia !

Unë po i ngijë njerëzit me qumësht ,

Por s’ ma banë gajlen askush !

 

Mprehin thikat , ngrehin dredhat –

Para sysh mi presin  edhat !

Për bark t’ vet me bë  sevapin –

Para sysh ma presin cjapin !

 

Gjeli :

 

Po sa derën Zoti e çeli –

Para Tij, nisi t’ flet Gjeli !

Ditë e natë për njerëz kam këndua ,

N’ mëngjes herët i kam zgjua !

 

Nuk kam këqyrë çka po m’ jep shpija –

I kam ruajt pulat e mia !

Por njerëzit mezi po presin –

Kokën time që t’ ma presin !

 

 

 

Kështu po bëjnë këta njerëz , si  trima –

Po mi lanë zogjtë jetima !

N’ oda t’ burrave kërcet pushka –

Po mi lanë krejt gratë vejushka !

 

Pula :

 

Priti e foli Pula  blerte  –

Edhe unë i kam do derte !...

Po iu bëjë veze çdo ditë –

Fëmijët e vet me to tu i rritë !

 

Si po ngihen – po harrojnë ,

Kokën time po ma shkurtojnë !

Po mi lanë zogjtë jetimë ,

Tu kullotë nëpër lendinë !

 

Qeni:

 

Para Zotit ,  foli Qeni –

Unë e  di se qysh është reni !

Lidhur rri n’ kaçak te veni –

Zbatoj rregullat si për peni !

 

Ruaj oborrin , ruaj shtëpinë –

Mos me i ngrënë ujqit bagëtinë !

I ruaj pulat n’ troje t’ vjetra –

Që t’ mos vinë me i hëngër dhelpra !

 

Rri gjithë ditën duke durua –

Askush gajle nuk ka për mua !

Vet rrinë brenda , pinë e rrasin –

Për pikë t’ qejfit mua më vrasin !

 

Lepuri :

 

Kështu tek Zoti ,  njëri pas tjetri –

Me u ankua hyri Lepuri !

Zot i Madh , mos banë me hile –

Unë s’ kam shpi, as s’ kam familje !

 

Nëpër shpella rroj i shkreti –

E qoj jetën për kiameti !

S’ kam me ngrënë, as s’ kam me pi –

Kaloj jetën n’ burg të zi !

 

S’ po guxoj prej shpellës me dalë ,

Se po m’ ndjekin nëpër mal !

Me armë n’ krah do gjuetarë –

Veç po m’ ndjekin me zagarë !

 

N’ mal e n’ kodër po m’ përplasin –

Për pikë t’ qejfit po më vrasin !

Kur po shkojnë n’ aksham te shpija –

Mishin tim po e ngrënin fëmija !

 

Peshku :

 

Foli Peshku – Zot , na ruaj ,

Na po rrënojmë shumë thellë nën ujë ,

Edhe borxh s’i kem  askujt –

S’ po na lanë njerëzit me luajt !

 

Zaptojnë lumin, zaptojnë detin –

Neve n’ fyt po na e shtinë grepin !

Për gazepi po na e shuajnë jetën –

Ushqejnë fëmijët , ushqejnë vetën !

 

Zot i Madh , banë me rahmet –

Na shpëto nga ky milet !

Zot, mësoja  të vërtetën –

Se edhe ne e duam jetën !

 

Gjilan, më 29.05.2014.     Demir KRASNIQI