Qazim Shehu: Krisma

QAZIM SHEHU

 

KRISMA

 

Nata shpështillet humnerave të saj,

më fton ta dua,

përkund ëndrra të arta,

Në barkun e saj vetëtijnë

Krismat e fjalëve të pakta…

 

 

KUKULLAT

 

Dikur nuk e dija,

Se njerëzit ishin kukulla,

Ne kukull s`kishim,

Shpesh mungonte buka.

Vonë e kuptova këtë,

Njerëzit si kukullat s`qenë,

Ishin më të bukurat.

Ah, nuk i kuptova kukullat.

 

 

FOGRAFOVA NJË RE NË QIELL

 

Sot, fotografova një re në qiell,

Me sy, me shpirt.

Shikimin kur ngrita sërish,

Reja më nuk qe.

Eh, ç`fotografi që bëra

Me një re.

Nga qindra të tjera,

Ajo,

Më e bukura qe…

 

 

TË PASURIT

 

Ndërrojnë:makinat,gratë shtëpitë,

Me gjak të varfërish shtojnë pasuritë.

Hajnitë i kyçin në ligje,prej ligjesh jetojnë,

Kur zihen ngushtë,

Partitë në gjirin e tyre i strehojnë…

 

 

VORBULL

 

Emri i detit që s`u pa,

Fjala nuk u tha,

E thëna s`u dëgjua,

Dëgjimi u harrua.

Harresa u mpi,

Mpirja u ngri,

Ngrirja u derdh,

Zjarri tek erdh.

Kujtesa u shpërnda,

Pluhur në zemër ra…

 

 

BIOGRAFI

 

Biografia na nxin jetën,

Jemi bijë të mashtrimit,

Nëse pa të mbesim

Ia hodhëm trishtimit.

Të tjerët kur ta shkruajnë,

Për ne s`do mendojnë,

Vetëm do të vuajnë,

Të ruajnë një rrethanë.

Duke na pasur ne ,

Si lojë a preteks,

Më mirë  të ishim re,

Të ikim më shpejt..

 

 

NJERIU

 

Kush është ai që merr kokën në duar,

Nga qiell bie meteor i shuar.

Është njeriu.

Kush është ai që qiellit i turret,

Si një shtrese akulli për ta coptuar,

Në kazanin e egos e shkriu?

Prapë njeriu…

 

 

CJAPI

 

Mjekër e malit krihet nga stuhia

Mjekër mbreti,

Në shi e mbyt hidhësia,

Sipër një shkrepi.

Ç`shikon ashtu, o cjap trishtues,

Mos ftujkën që ta therën,

Ujkun që i afrohet tufës,

Qenin që s`i bie erës?

 

Në shiun plot rrëzjerë

Mos do të hidhesh poshtë humnerës,

Për ftujkëzën e mjerë?...

 

 

TUNDIM

 

Tundimet dalin nga mëngë e ditës,

Plot joshje,rreze të kobshme,

Hidhen me vërtik si zëra mbi humnera,

Nuk i bën zap as era.

Jeta me pabesi aq e aq tundime na ve përpara.

Sa për tundimet e vjetra të merr e qara…

 

 

VALVULA

 

Hyra në zemrën tënde,

Si përrua në një guvë.

Rrugën për të dalë s`e gjeta.

As ashpër as butë.

Zemra e ka një shteg,

Ku mund të hysh, të dalësh,

Një breg

Për përplasje dallgësh.

Ndryshe,

Në oqean do qe thyer,

Pa,

Valvulën e vyer…

 

 

KËSHTJELLA

 

Gurë të çmuar me tepri

Të ndërtoj një kështjellë,

E ndezur, kjo dashuri,

Më sjell..

E pamposhtur është ajo,

Korracëhirtë në trup,

sa çdo shenjë të gjallë,

E zhduk…