Kulturë
Përparim Hysi: Fallxhorja e Monpeljesë
E enjte, 13.06.2013, 06:11 PM
Fallxhorja e Monpeljesë
(tregim)
Nga Përparim Hysi
Aty
mesviteve '30 të të shekullit të kaluar, tre shokë kishin dalë për shetitjen e
fundjavës. Qenë tre shokë, por mos kujtoni se qenë tre Mosketjerët e Dumasit
dhe as tre shokët mitikë të Remarkut. Qenë tre bursistë të Mbretërisë Shqiptare që ca për arsye
objektive dhe ndonjë dhe për arsye subjektive , era e studimeve i kish vërvitur
në universitetin e Monpeljesë në tri degë të ndryshme.
Të tre
ishin nga jugu i Shqipërisë. Njëri qe qytetar nga Gjirokastara dhe dy bursistët
e tjerë qenë fshatarë nga Skrapari. Sidoqoftë, ashtu siç thuhet nga jugu
"Moj kasolle, ku na mblodhe", edhe këta, sado që nuk qenë aq shokë
intimë, kishin dalë atë fundjave për qejf të vet.
Dy
skraparlinjtë, të njohur prej kohësh dhe nga rrethi miqësor familjar, flinin në
të njëjtën dhomë, sado që fakultetet i kishin të ndryshëm. Tek kjo dhomë, xhëku
kalonte, ashtu si rastësisht. edhe gjirokastriti që, edhe ky, ndiqte një
fakultet tjetër. Skraparlinjtë ndiqnin
njëri drejtësinë dhe tjetri për histori. Gjirokastriti për biologji.
* *
*
Pa shkuar
drejt e tek "fallxhorja", ia vlen që t'i heqim pakëz petët lakrorit.
Skaraprliu që fitoi bursë për juridik,
ishte Hilmi Qazim Hysi nga Vërzhezha e
Skraparit. Pse qe stundent honor ( vinte nga Liceu francez i Korçës) u thirr në audiencë - tet a
tete- tek vet ministri i arsimit Mirash Ivanaj. Me afërsi, është bërë kjo
bisedë kokë për kokë:
- Je
laurant dhe ke të drejtën e zgjedhjes për degën që do.
- Dua të
vazhdoj për histori.
Ministri,
pasi dëgjoi me prudencë laurantin, i thotë:
- A ban me
ma fal nji nder? Bash këtë degë ia kam
premtue nji nxanësit tim honor që ka mbarue në Shkodër dhe a mund me zgjedh nji
degë tjetër? A pranon me shkue për drejtësi?
- Pa
tjetër,- pranoi lauranti. Po kush është ai nxënës?
- Asht
skraparli si ti. Quhet Abaz Ermënji !
- Oh,-
qeshi i çliruar lauranti,- me Abazin njihemi prej kohësh dhe kemi miqësi familjare.
Ja, pra,
këta dy studentë honorë, njëri
mbaruar në Shkodër dhe tjetri në Korçë u
çuan me bursë të shtetit në Monpelje. I
treti, gjirokastriti, fitoi dhe ai bursë shteti. Po për bursën e tij ka shumë
gojëdhëna, të cilat historia ende nuk i ka saktësuar. Gjirokastriti është Enver
Hoxha që njihet më shumë se kushdo nga kjo treshe që janë personazhë të këtij
tregimi. Enver Hoxha njihej që në lice me Hilmi Hysin dhe kjo ishte arsyeja,
që, shpesh, dukej nga dhoma e dy skraparlinjëve.
* *
*
Tek
vazhdoni rrugën për në klubin ku do festonin, befas u pret rrugën një
fallxhore.
- A doni
të merrni vesh gjithë të ardhmen tuaj
nga sot e deri sa të shkoni nga kjo botë? Vetëm më tregoni pëllëmbën dhe unë do
t'u lexojë sikur po lexoni një libër gjithçka për ju. Hokatarë siç qenë, thanë
ta provonin. I pari e zgjati dorën
Hilmiu. Fallxhorja e rroku pëllëmbën e të riut,
e shikoi mirë e mirë. Bëri sikur iu
drejtua Zotit dhe i tha: - Ty nuk ta
"lexoj" dot. Ke pak damarë të trashë. Hilmiu as që u mërzit
nga ky "moslexim" se as që besonte në këto lexime astrologësh. Radha i erdhi Abazit. Fallxhorja
ia mori dorën dhe,pasi ia "lexoi" mirë e mirë, i tha: - Ke për të kaluar një jetë plot dallgë. Do shkosh
në vëndin tënd dhe nuk ke për të qëndruar gjatë atje. Do largohesh, për punë të
një "sherri" të madh dhe, për të shpëtuar kokën, do rrishë i mërguar
gati për 50-vjet. Do kthehesh, pas pesëdhjetë vjetësh, e do fitosh të drejtat
që të kanë mohuar. Kur mori dorën e
Enverit, tha: -Sado që nuk je aq i zoti në mësime si ky më parë, ti do kesh një jetë të bukur dhe do të
respektojnë kush me hir e kush me pahirë. Në vëndin tënd ty do të vejë puna
mbroth. I dhanë fallxhores hakën dhe, tek u ulën në klub, vetëm me fallin
e fallxhores u morën. Vetëm për ty, o
"damartrash" nuk morëm vesh gjë,- foli Enveri.
* *
*
Me të
mbaruar fakultetin, Abazi u emërua në Liceun e Korçës. Aty, në lice, për
çudi,sado me shkollë të pambaruar, erdhi
dhe Enver Hoxha. Hilmiu qe gjykatës në Tiranë. Kur fillo lufta kundër
fashizmit, Abaz Ermënji la katedrën e mësuesit
dhe doli malit. Ai qe komandant i një çete nacionaliste dhe aderoi me
Ballin Kombëtar. Edhe Hilmi Hysi, sado gjykatës, kishte ide nacionaliste dhe
andej dhe aderoi. Sakaq, në Tiranë, kish
mbrritur Enver Hoxha që punonte si "shitës" në dyqanin
"Flora". Sado që historiiografia komuniste përpiqet për ta nxjerrë
Enver Hoxhën si trim që të merrte gjak në vetull, e vërteta është pak ndryshe.
Në kohën e pushtimit fashist, kur puna e "shitsit" kish marrë erë,
Enver Hoxha kërkoi ndihmën e Hilmiut. Donte letërnjoftimin e tij. Hilmiu, sado
"damartrashë" ia dha letërnjoftimin e tij. Por, sidoqoftë, në
fotografi kishte një mospërputhje: Hilmi Hysi kishte syze dhe mustaqe. Për t'u
bërë "sozia" e tij, Enver Hoxha rriti mustaqe dhe vuri syze.
Fotografinë "plagjiat" ia bëri Qemal Stafa. Kjo fotografi, me syze e
mustaqe ka qenë e njohur, pothuaj, prej 50-vjetësh. vetëm nuk dihej shkaku.
Gjatë kohës, Hilmiu ishte martuar me Mynever Skraparin (Sanxhaku) që kish
mbaruar Institutin "Nana Mbretëreshë" dhe qe bashkëshoqe me Nexhmie Hoxhën ( Xhunglini) që tani krah Enver Hoxhës njihej si
"Delikatja". Edhe Myneveri ( ngjasonin çuditshëm !) i dhuroi shoqes së
saj letërnjoftimin. Kështu që "trimi" Enver Hoxha me
"trimëreshën" Delikate nuk e kishin as për pesë nga kontrollet e
befasishme. Kishin gjetur parzmoren e duhur.
* *
*
Se si
vazhdon historia e këtyre tre shokëve, pjesërisht dihet vetëm për njërin
prej tyre: për Enver Hoxhën. Për të janë
thën e stërthënë të vërteta e të
pavërteta që,sidoqoftë, kurrë nuk është vonë për t'u zbuluar me saktësi. Unë as
që dua të futem në ato ujëra. Vetëm si
apendiks të asaj që "lexoi" fallxhorja, mund t'ju them:
Abaz
Ermënji luftoi kundrë nazi-fashistëve dhe pse
shoku i biologjisë në Mospelje, ia kish vënë kokën në satër, u arratis
nga Shqipëria dhe qëndroi larg saj për
gati 50-vjet. Ka qenë kryetari i Ballit Kombëtar në mërgim dhe në vitet kur
erdhi demokracia, u kthye në Shqipëri. Qe dhe deputet për ballin Kombëtar, po,
për arsye moshe, vdiq para disa vjetësh.
Fati i
Enver Hoxhës dihet dhe nuk dua të bëhem i bezdishsëm për lexuesin.
Por
ç'ndodhi me tjetrin, që fallxhorja e
Monpeljesë nuk ia lexoi dot të ardhmen? Vërtet të qe "damartrash?!" .
* *
*
Hilmi Hysi si jurist bënte detyrën edhe në kohën e
luftës. Ai qe nacionalist dhe priste që vëndi të çlirohej. Si njeri i ligjit,
kur u çlirua Shqipëria, nuk e kishte për
gjë që të mbronte,qoft dhe si avokat, të dënuar qofshin dhe politik.
"Biologu", sado që e detyrohej me gjithë të shoqen, Delikaten (atë
kohë Enveri qe martuar ), ndiqte çdo veprim të "mikut" të tij. Bëhej
gjyq në Berat. Midis të akuzuarëve ishte dhe oficeri zogist, komandanti i një
çete nacioanliste në Skrapar, Muharrem
Kapllani. Sado që "ariu i foli në vesh" që mos e mbronte një armik si
Muharremi, Hilmi Hysi shkoi dhe i bëri
oponencën. Muharremin e kishte mik dhe
bashkëfshatar. Vërtet që nuk e shpëtoi, por mbrojtjen e bëri.
"Biologu" Enver Hoxha i mori pak gjak në vesh mikut të letërnjoftimit. E transferoi nga Tirana në
Gjirokastër. Atje ( thonë një mësues) ia përgatiti qefinin. Papritur e kujtuar
në vjeshtë të vitit 1947, Hilmi Hysin e
arrestojnë
Në
mesnatë (aty nga ora njëmbëdhjetë) kamionçina e mbuluar mbante në pranga Hilim
Hysin. Diku kamionçina ndalon dhe njëri
prej policëve zbret. Drejtohet tek një klub privat dhe kërkon dy racione bukë e
gjellë (edhe për shokun). Privati duke patur alergji për policët ia pret:- Buka
u mbarua dhe gjella. Polici u kthye
hundë e buzë. Nuk kishte,- i tha shokut. Bobo!- ulëriti tjetri. Hajde
dhe duro deri në Tiranë. I arrestuari i dëgjoi dhe pyeti:
-Ku jemi
këtu?
-Në
Lushnje, po na griu për bukë dhe klubaxhiu e kish mbaruar.
-Shko i
thuaj se kam në makinë Hilmi Hysin dhe e
do bukën për mua. Se e njoh atë klubaxhinë.
Polici u
khye prapë dhe teksa pronari po tentonte ta mbyllte, polici i tha:- Më ka
dërguar Hilmi Hysi.
Oh, - tha
pronari,- kam vetëm bukën time dhe merre çoja Hilmiut.
* * *
Më tej historia është e gjatë, por atë që nuk "lexoi" falxhorja, e lexoi "biologu" Enver Hoxha. E pushaktoi Hilmi Hysin,pasi e torturoi për tri-katër muaj të mirë, në moshën 35 vjeçare. E hoqi të shoqen nga Tirana dhe e syrgjynosi në Këmishtaj të Lushnjes me dy çupat njërën 5-6 vjeç dhe tjetra 3-katër vjeç. Jo vetëm e pushkatoi, por deri sot as nuk e kemi gjetur varrin.Dhe i vetmi "krim" që bëri qe se ndihmoi "biologun" në kohën e fashizmit. Dhe ç'shkruaj për "letërnjoftimet" është pohuar nga Enver Hoxha në prag të vdekjes. Retushoj një nga "veprat" dhe shkroi e zezë mbi të bardhë për këtë ndihmë. Pa e zënë në gojë emrin, e të ndjerit xhaxhaii tim (gjasme ia kish harruar dhe i kujtohej vetëm mbiemri: Hysi!). Kuptohet, mandej, pse "Fallxhorja e Monpeljesë" nuk ia "lexoi" dot dorën.